KuWoza Friday liviki siledlalade elitsha lomculi uCharity Dube ongomunye wabaculi besifazana beZimbabwe abalutshwana asebengene emculweni kaMaskandi owaziwa ngokugcwala abesilisa.
Lezi zintombi lensizwa zeqembu likaMaskandi elizibiza iKhwezi Elihle bevula idlalade labo ngengoma ethi Bantwabethu phindelani esikolweni lelilizwe selifuna abafundileyo.
Lelidlalade elithi Izandla ziyagezana ngumsebenzi wentombendala uCharity Dube odabuka eManama eGwanda.
UCharity ubumbe leli qembu ngo 2014 ndawonye lo Abednico Ncube ngemva kokucula okwesikhathi eside eqenjini laMabala Engwe. Uthi njengelinye lamazibulo kwabesifazana abasemculweni kaMaskandi kukhulu aza lakho.
“Ngibathembisa ukuthi bazojabula kakhulu. Zikhona ingoma ezihlekisayo ezinye, ezinye ezikhalisayo, ezinye ezibuhlungu, ezinye ngezokholo. Njengabaculi sikhala ngamalokhuza la athetshwayo ukuthi bangayenzi lento ukuze lathi sikhule ngoba kunzima emculweni.
Idlalade labo leli lilengoma ezilitshumi lambili kugoqela lale ethi Izandla ziyagezana.
Bathike udaba olusegudwini kuleli dlalade ngolokuthandana lokusizana njengabantu besizwe sinye. Kantike uAbednico Ncube uthi makhulu amaphupho abalawo ngaleli qembu.
Ikusasa lihle kakhulu ngoba abantu abanengi bayasimema kakhulu emcimbini emnengi okubonisa ukuthi bayasijabulela bayalithanda. Amaphupho ethu yikuthi sengathi abantu abanengi ikakhulu amantombazana, bangangena kule indima yonculo wesintu sibabone bonke bekujabulela bekuthokozela ukwenza umculo wesintu ngoba yinto zamasiko lezi.
Your browser doesn’t support HTML5
Woza Friday: Umculi womdumo kaMaskandi uCharity Dube