Amapholisa abophe abantu abanengi ngoMgqibelo akade betshengisela emadolobheni atshiyeneyo abafuna kuguqulwe indlela okwenziwa ngayo ukhetho eZimbabwe.
Ababotshiweyo laba abakumabandla akunhlanganiso yeNational Electoral Reform Agenda (NERA) afuna kulungiswe ezokhetho kungakafiki ukhetho lomnyaka ka2018, bagoqela amalunga akudale lephalamende abakubandla leMovement for Democratic Change ekhokhelwa nguMnu. Morgan Tsvangirai.
Amabandla akunhlanganiso yeNERA agoqela iMDC-T, Zimbabwe People First, People’s Democratic Party, Transform Zimbabwe, MDC-N lamanye aphikisa uhulumende kaMongameli Robert Mugabe.
UMnu. Nelson Chamisa, umsekeli kamongameli webandla leMDC-T, utshele iStudio 7 ukuthi amapholisa atshaye abalandela ibandla lakhe elokitshini leKuwadzana kwathi abanye babotshwa ngesikhathi betshengisela ezitaladini.
UNkosikazi Ronia Bunjira, omele iWaterfalls edale lephalamende ubotshiwe ngesikhathi amalunga eMDC-T etshengisela elokitshini lelo kwathi-ke eMutare amapholisa abophe njalo uMnu. Trevor Saruvaka omele iMutasa Central edale lephalamende.
Ngesikhathi esifanayo, kubotshwe abantu abambalwa eGwanda lapho amagqwetha azimele wodwa awenhlanganiso yeAbammeli leye Zimbabwe Lawyers for Human Rights azame ngamandla wonke ukuthi kukhululwe izibotshwa ekade zitshengisela.
Abanye njalo ababotshiweyo kade betshengisela emadolobheni agoqela iGweru, Zvishavane, Kadoma le Chinhoyi.
KoBulawayo uNkosazana Thokozani Khuphe, umsekeli kamongameli webandla leMDC-T ubengomunye walabo akade bekhokhela ukutshengisela edolobheni lelo.
Amabandla akunhlanganiso yeNERA athi okwamanje iZimbabwe Electoral Commission kukhanye isekela ibandla elibusayo eleZanu PF. IZEC iyakuphikisa lokhu.