Nyakenye kubelabasakhulayo eZimbabwe abanengi abethule imbono yabo ngokuphathelane lendaba ezithize ezithinta impilo zabo kwezombusazwe, ezenotho lokunye okunenginengi, ngokutshengisela ezitaladini langokuloba enkundleni ezinengi zebulenjini ezifana leTwitter, Facebook lezinye.
Isakhamuzi sako Bulawayo njalo engosakhulayo, uMnumzana Pluto Ntabende, ucabange ukuveza umbono wakhe emmele abasakhulayo baseZimbabwe, efundisana labo ngezombusazwe esebenzisa ugwalo lakhe olulesihloko esithi “The Political Dilemma”, oluzokwethulwa mhlaka 4 ngoNhlolanja, esiphaleni sengwalo ese Bulawayo Public Library.
UNtabende uthe ugwalo lolu lukhangela udaba lwezombusazwe eZimbabwe njalo lujonge ukukhuthaza abatsha ukuba bezibone bephatheka kwezombusazwe.
UNtabende, owathi eloba ugwalo lolu ecabanga abatsha, ulethemba lokuthi lizobalwa nguye wonke umuntu eZimbabwe.
“Indaba zombusazwe eZimbabwe, zindaba ehluphayo. Into engathi sibhekane layo yikuthi abantu abanengi abaphatheki kundaba zombusazwe.”
Esephatha udaba lokungena kuka Mongameli Robert Mugabe kukhetho oluzayo, uNtabende uthe abantu kwele Zimbabwe balelungelo lokukhetha umuntu ababefunayo.
UNtabende uphinde wathi ugwalo lolu luzabe lunikwezwa abatsha izizatho zokuba baphatheka endabeni zombusazwe. Lukthinta njalo uhlelo lokubhalisa ukuvota olwe Biometric Voting System.
Laba abafuna ukuthola ulwazi mayelana ngogwalo lolu kumele balandele uNtabende enkundleni zebulenjini, kuFacebook, ngaphansi kwe gama Pluto Ntabende, laku Twitter, ngaphantsi kwegama @simplypluto.
Your browser doesn’t support HTML5
Ingxoxo phakathi ka Mike Hove lo Pluto Ntabende