Abantu abanengi bathi kuqhubekela phambili ukukhuphuka kwentengo yempahla etshiyeneyo egoqela isinkwa, amafutho okupheka lokunye.
Abantu esikhulume labo eMasvingo, koBulawayo, eGwanda, Tsholotsho lezinye indawo kwele Zimabbwe bathe abanikazi bamabhasi athwala uzulu sebekhuphule lenhlawulo yokuhamba ngamabhasi.
FILE: Kwake kwahlupha ukudinga isinkwa eZimbabwe esasesibiza imali enengi okumangalisayo ngomnyaka ka2008.
Bathi endaweni ezinengi isinkwa asisatholakali ezitolo njalo intengo yaso ikhuphuka okumangalisayo. Kukhanya engani lentengo yamafutho okupheka isikhuphikile endaweni ezinengi zelizwe.
Isakhamuzi seJerera eMasvingo, uNkosikazi Itai Dube, uthi bakhangelele ukuthi uMongameli Emmerson Mnangagwa akhulume ngokukhuphuka kwentengo yempahla etshiyeneyo lokusilela kwesinkwa, amafutha okupheka lawezimota lokunye okunengi nengi.
Uthi kuqhakathekile kakhulu ukuthi akhulume langomthelo wokuthumeza imali ngomakhalekhukhwini osanda kwethulwa ngumphathintambo wezemali, uMnu. Mthuli Ncube.
Abantu bakhangelelwe ukuthi bazakhokha ama cents amabili idola linye ngalinye nxa bethumeza amadola adlula itshumi ngomakhalekhukhwini kumbe ebulenjini beInternet lakumabhanga.
UNkosikazi Dube uthi impilo isinzima kwele Zimbabwe ngoba kukhanya engani intengo yempahla ikhuphuka okungapheliyo.
Your browser doesn’t support HTML5
Ingxoxo Esiyenze LoNkosikazi Itai Dube Ngokukhuphuka Kwentengo Yesinkwa Lokunye Okumbalwa
ETsholotsho esabelweni seMatabeleland North, uMnu. Johanne Mthembo, uthi isinkwa siyaphela ezitolo. Uthi lokhu kwenza kube nzima ukuthi basithengele imuli zabo.
Ukhala kakhulu ngokuswelakala kwezulu esithi abantu bazehluleka ukulima okwaneleyo lonyaka.
Your browser doesn’t support HTML5
Ingxoxo Esiyenze LoMnu. Johanne Mthembo
Ukuze sizwe okunengi ngokukhuphuka kwentengo yempahla etshiyeneyo njalo lokusilela kweyinye impahla, sixoxe loNkosikazi Rosemary Siyachitema, umgcinisihlalo wenhlanganiso ebona ngontengo yempahla eyeConsumer Council of Zimbabwe.
UNkosikazi Siyachitema uthi kwakuvele kuzikhanyela mgceke ukuthi intengo yempahla izakhuphuka ngendlela emangalisayo lonyaka.
Uthi kwaqalisa ngokukhuphuka kwentengo yenyama kwathi-ke okwamanje abantu betshuswa ngumthetho owethulwe nguMnu. Mthuli Ncube owokuthumeza imali kumakhalekhukhuni.
Uthi bakhulumisana lohulumende ukwenzela ukuthi umthetho ungethulelwa uzulu ngoba abantu bazahlupheka okumangalisayo.
Your browser doesn’t support HTML5
Ingxoxo Esiyenze LoNkosikazi Rosemary Siyachitema
Uzulu ubehlawula 5 cents kuphela nxa ethumeza imali ngomakhalekhukhwini kumbe ebulenjini beInternet.