Owayengumdlali wenguqu uCosta Maradzike obhubhe ngeviki edluleyo ubekwe emathuneni eWest Park edolobheni lako Bulawayo ngoLwesihlanu.
UMaradzike wedlule emhlabeni ngoLwesibili olwedluleyo ngemva kokugula okwesikhatshana. Udadewabo uCosen uthi umthethe eBindura ngemva kokuzwa ukuba akezwa kuhle wamletha ko Bulawayo lapho abamuse khona esibhedlela seMpilo okuyilapho aphelele khona.
“Mina kungithinte kakhulu ngoba vele akazange agule okwesikhathi eside. Thina emulini besiyisithupha kulamankazana amathathu labafana abathathu. Nguye okade esengubhudi esimthembileyo simtshela izikhalazo zethu zonke, sincedisana laye.”
UMaradzike uqale ukudlala ibhora edolobheni le Kwekwe lapho akhulela khona edlalela iqembu labasakhulayo ele Chrome Stars wasuka lapho wayadlalela iqembu le Lancashire Steel njalo ubelilunga leqembu le Lancashire elaphakamisa inkezo ye Madison Trophy ngomnyaka ka 1999.
Ngalesosikhathi ubelilunga leqembu labaleminyaka engaphansi kwamatshumi amabili lantathu elimela ilizwe emdlalweni wenguqu elaziwa ngokuthi ngama Young Warriors.
Ngomnyaka ka 2003 uMaradzike uze koBulawayo ukuzodlalela iqembu le Highlanders kwathi ngo 2005 usuke waya kuqembu le Mwana Africa lona elalidlala kusigaba se Zifa Northern Region Division One lapho afike waba ngukaputeni walikhokhela layadlala kusigaba se Premier Soccer League.
Kuqembu le Mwana Africa uphakamise inkezo ye CBZ Cup kanye leye Nestle Charity Shield njalo uphatheke kumncintiswano we CAF Confederation Cup engukaputeni weqembu elalilabadlali abagoqela uThomas Sweswe, uLovemore Makwavarara, uTendai Mwarura, uChipo Tsozdo, uBlessing Gumiso kanye labanye.
UTsodzo ubengomunye abakade bethwele ibhokisi lomufi njalo uthi ilizwe lilahlekelwe kakhulu ngokubhubha kuka Maradzike.
“UCosta sihlangane kuqembu le Highlanders njalo ubengumuntu olungileyo. Usuke wayadlala kuqembu le Mwana Africa lami ngamlandela sadlala sonke kumncintiswano wokudinga intshantshu zezwekazi lase Africa. Silahlekelwe ngumuntu sibili obengumuntu wabantu.”
Ilunga leqembu labaqeqetshi labakhokheli bamaqembu omdlalo wenguqu elaziwa ngokuthi yi Soccer Updates uSibuyile Hadebe uthi yena wayengumlandeli omkhulu ka uMaradzike njalo ulusizi kakhulu ngokwedlula kwakhe emhlabeni.
“Mina ngangingumsekeli kaCosta njalo ngabamazi esadlalela iqembu le Highlanders. Kwenzakala ukuba ngesikhathi esiyadlala kuqembu le Mwana Africa lami ngasuka ngayasebenzela eMazowe. Njengomsekeli weqembu le Highlanders ukuba khona kwakhe kwangenza ngathanda iqembu le Mwana Africa njalo saba lobudlelwano obuseduze okokuthi lonkosikazi wakhe wakuqala unakaSharon wayesazi ukuba kulobabakazi eMazowe.”
Iqembu le Soccer Updates liphathise imuli yako Maradzike ngemali edlula amakhulu amathathu.
Ekutshiyeni kwakhe ukudlala ibhola uMaradzike ubesengumqeqetshi njalo uke waqeqetsha iqembu le Trojan Stars walingenisa kusigaba se Northern Region Division One.
UMaradzike ubesele minyaka engamatshumi amane lanye eyokuzalwa njalo utshiye abantwana abahlanu uSharon, uTafadzwa, uNaika, uTinevimbo kanye lo Craig.