Abamele ibandla lePatriotic Zimbabweans Party, elikhokhelwa nguMnu. Charles Mutama, namuhla bakhulume labaphethe ikhomithi yedale lephalamende ebona ngezemithetho ngesicelo sabo esokuthi izizalwane zeZimbabwe ezihlala kwamanye amazwe kumele zivote kukhetho oluzakwenziwa ngomnyaka ka2023. Loba kunjalo, kusakude phambili.
Ikhomithi yeParliamentary Legal Affairs kubikwa ukuba ikhulume ngodaba lolu labamele ibandla lePatriotic Zimbabweans Party, babatshela ukuba badingisise indlela ababona ukuba kungenziwani ukuze izizalwane zeZimbabwe ezihlala kwamanye amazwe zivote.
UMnu. Mpilo Mathuthu, umgcinisihlalo webandla leli, uthi basanda kwethulela idale leli ugwalo olujulileyo olwePetition belibonisa ngokuqakatheka kokuvota kwalaba abahlala kwamanye amazwe.
Manengi amabandla afisa ukuba abahlala kwamanye amazwe bavote. Elinye lawo ngelikhokhelwa nguMnu. Innocent Ndibali eleEconomic Freedom Fighters Zimbabwe. UNdibali uthi kuqakathekile ukuba abantu bonke abadabuka eZimbabwe bavote.
UMnu. Joseph Tshuma, osekela ibandla leZanu PF, uthi uyakusekela lokhu lobanje esithi kumele udaba lolu luphathwe ngemfanelo.
Obona ngenhlelo zokukhanga abantu ukuba bangene kubandla leZanu PF, uMnu. Patrick Chinamasa, watshela intathelizindaba eHarare ngoMpandula ukuba abadabuka eZimbabwe abahlala kwamanye amazwe bazavunyelwa ukuvota kungalungiswa imithetho yokuvote.
Waphinda wathi kumele kwesulwe izijeziso zenotho ezafakelwa inkokheli yebandla elibusayo kungakenziwa lokhu.
Your browser doesn’t support HTML5
Ibandla lePatriotic Zimbabweans Liphanyeka Udaba Lokuvota Ephalamende