UPeter Muduhwa ngomunye wabadlali abasematheni kazulu olandela umdlalo wenguqu lonyaka ngemva kokudlala kuhle edlalela iqembu le Highlanders.
Sixhumane laye lumdlali oleminyaka engamatshumi amabili lantathu eyokuzalwa ukuze asitshele kabanzi ngembali yakhe.
“Mina ngiqale ukudlala ibhola eleminyaka eyithoba minwe mbili ngisafunda esikolo se Godlwayo Primary School esiselokitshini le Pumula. Ngisuke lapho ngayadlala kuqembu le Boot Laces ngaphinda njalo ngadlala kuqembu le MK Lions kuma Under 13 ngaze ngaba li Under 15, ngithe ngisuka lapho ngayadlala kuqembu le Ajax Hotspurs engidlale khona kusukela ngiku Under 16 ngaze ngafika ku Division 2.”
Umfoka Muduhwa uke wayadlala elizweni le Botswana lapho adlalele iqembu le Botswana Meat Commission ngomnyaka ka 2012 kwathi ngomnyaka ka 2013 uphenduke ekhaya wazodlala njalo kuqembu le Ajax ebeselidlala kusigaba sika Division One.
Uyale elokhu ekuqembu le Ajax ngomnyaka ka 2014 kwathi ekuqaleni kuka 2015 wasesiya kuqembu le Highlanders lona elimhambise kuqembu le Bulawayo Chiefs laselimthatha phakathi laphakathi komnyaka.
“Nyakenye ngifike ku Highlanders sekusele imidlalo elitshumi lanhlanu eyokucina njalo ngadlala kweminye yakhona. Lonyaka ngingene ethimini sekudlalwe imidlalo eyithoba minwe mbili njalo kube lula ukuba ngidlale ngoba ngadlala kumabanga onke kusukela ngisasemncane.”
Indlela uMuduhwa adlala ngayo idale ukuba abanye bathi kumele abeyingxenye yeqembu le sizwe elama Warriors lona elizakuyaphatheka kumidlalo ye Africa Cup of Nations ngomnyaka ozayo.
Yena umfoka Muduhwa uthi lokhu kusemandleni akamqeqetshi weqembu lesizwe uKalisto Pasuwa.
“Ngikhangelele ukuba ngiyale ngilokhu ngidlala kuhle kuqembu le Highlanders mhlawumbe ngingaba lenhlanhla lami ngiyedlala phandle kwelizwe.
Bosso player Peter Muduhwa.
Kuqembu lesizwe kuya ngokuthi umqemqetshi uyangibona yini ngoba okuqakathekileyo yikuba umqeqetshi akholwe kuwe.”
Iqembu le Highlanders lilwisa ukuphakamisa isicoco seligi lapho elincintisana khona kabuhlungu lamaqembu abalisa ele Caps United kanye lele FC Platinum.
Lisaselethuba futhi elokuphakamisa inkezo ye Chibuku Super Cup njalo lizangqikilana emdlalweni we semi – final leqembu le Ngezi Platinum ngeSonto enkundleni ye Barbourfields.
UPeter Muduhwa ukhangelelwe ukuba ngomunye wabadlali abazadlala indima enkulu kumkhankaso weqembu le Bosso owokuphakamisa izicoco lezi zombili.
Your browser doesn’t support HTML5
Udaba Esilathulelwe nguJoseph Njanji