Umphathintambo wezemali uMnu. Patrick Chinamasa ngeviki edluleyo wazise ukuba izisebenzi zikahulumende kazisoze zithole amabhonasi okweminyaka embili elandelayo ngoba uhulumende engaselamali.
UChinamasa ukhulume lamazwi esethula umbiko wakhe wokuhlela ukubuthaniswa kwemali kahulumende kanye lendleko zakhe lonyaka owe monetary policy review. Wengeze uChinamasa esithi imali ephiwa izisebenzi phezu kweholo lazo, ama allowances, asezakwehliswa kanye lokugumula ezinye zezisebenzi zakhe emizameni yokwehlisa indleko kahulumende.
Lokhu kucunule izisebenzi zikahulumende lezinye iziphathamandla zebandla leZanu PF okugoqela loMongameli Robert Mugabe ohle wathuma umphathintambo wezokwethulwa kwemibiko uMnu. Christopher Mushove ukuthi ayethule umbiko othi uChinamasa uzenzele okwekhanda lakhe akuzange kuvunyelwane edale leCabinet.
Ukuhlaziya ukufuthelana osokukhona phakathi kwabampathintambo laba bobabili ngalesi simo iStudio 7 ixoxe loMfundisi Useni Sibanda owe Christian Alliance of Zimbabwe lesiphathamandla sebandla eliphikisayo elePeople’s Democratic Party, uNkosikazi Lucia Matibenga.
Umnotho welizwe leZimbabwe kawumanga kahle ngenxa yokuswelakala kwemali yokuvuselela imitshina yokwenza impahla enengi yokuthengisela uzulu labosobhizimisi.
Your browser doesn’t support HTML5
Ingxoxo Esiyenze LoMfundisi Useni Sibanda LoNkosikazi Lucia Matibenga