Idale leHigh Court ngoMvulo lethule isingqumo sokuba ukuvalwa kwamagagasi obulembu be Internet akukho emthethweni.
Umahluli uJustice Owen Tagu uthe umphathintambo wezenzakala ewofisini kamongameli, uMnu. Owen Mudha Ncube, kalalungelo lokuvala amagagasi la.
Ngeviki edluleyo ngemva kokuqhamuka kobudlwangudlwangu ngesikhathi abantu betshengisela phezu kuphulwa kwentengo yamafutha ezimota okuphindwe phose kathathu lokonakala komnotho welizwe, uhulumende wacitsha amagagasi obulembu esithi wenqabela ukusabalala kwemibiko engelaqinisio etshotshozela ubudlwangudlwangu.
Amagagasi la avulwa ngoLwesithathu kodwa inkundla zokuxhumana ebulenjini ezifana labo Facebook labo Twitter bezingabambeki mathupha ngaphandle umuntu aze axhume ezinye izigxingi zamagagasi.
Umahluli uTagu, owe Harare High Court, uthe kasoze athonise udaba lokuthi ukuvalwa kwamagagasi lokhu phansi komthetho we Interception of Communication Act kuyephula na isisekelo sombuso welizwe kumbe hatshi. Ngemva kwesinqumo lesi amagagasi la ahle avulwa.
Ukuhlaziya loludaba uChris Gande weStudio 7 uxoxe lengcwethi ecubungula ezemithetho, uMnu. Kucaca Phulu.
“Uhlupho olubekhona yikuthi khona vele uhulumende lowu esikhathini esinengi, ungakhangela izinto azivumelayo abakwazi ukuthi bazenze njani belandela okusemthethweni,” kutsho uPhulu.
Uthi abakwenzayo benza kungani abala magqwetha abapha iziqondiso zemithetho.
“UMinister nguye owenze idirective yakhona. Kanti ke kumele kwenziwe yi regulator yakhona. Indaba yakhona isekuthetheni abalandelanga ama procedure singakakhangeli ukuthi abakwenzileyo kusemthethweni.”
Your browser doesn’t support HTML5
Ingxoxo loMnu. Kucaca Phulu