Ibandla eliphikisayo elikhokhelwa ngowake waba ngumsekeli kamongameli, uNkosikazi Joice Mujuru, liphawulwe okusemthethweni emhlanganweni walo wakuqala wenkokheli owe National Elective Convention owenzelwe enkundleni eCity Sports Centre, eHarare ngoLwesine.
UNkosikazi Mujuru leyinye inkokheli yamabandla aphikisayo batshengise ukuvumelana ukuba indlela kuphela engasusa uMongameli Robert Mugabe lebandla lakhe le Zanu PF embusweni yikungena kukhetho emanyene.
National People's Party Convention
UNkosikazi Mujuru utshele lumbuthano wabavele ezigabeni zonke zelizwe ukuba okumqoka ngomanyano wamabandla aphikisayo yikuba abazawukhokhela kube ngabavela kuzulu.
UMnu. Morgan Tsvangirayi, okhokhela ibandla le MDC-T, obezexhasa abeNPP kulumhlangano, uthe akasiboni isizatho sokuba ungabikhona lumanyano njengoba bekhuluma limi lunye.
Umkhokheli weZAPU, uMnu. Dumiso Dabengwa, obenxunsiwe laye kulomkhosi, uthe uvumelana lombono wabe NPP ukuba konke okwenziwayo makube ngokuvelela kuzulu.
Joice Mujuru
UDabengwa utshengise njalo ukujabulela inyathelo elithethwe ngabe NPP ukupawula ibandla labo okusemthethweni.
Owake waba ngumsekeli kaMayor wako Bulawayo, uAldernam Amon Mpofu, ngomunye wenkokheli eyethulwe okusemthethweni kulomkhosi.
UNkosikazi Esnathi Bulayani, odabuka ePlumtree, ukhethwe ukuba ngumsekeli womgcinisihlalo webandla leli.
Abebandla le NPP bathi bazonqoba kukhetho luka 2018 njalo bazimisele ukusebenzela abantu sebesembusweni, okubalisa ukuvuselela amankampani lohlangothi lokulima lokutholisa abasakhulayo imisebenzi.
UMnu. Morgan Tsvangirai loMnu. Dumiso Dabengwa
Ungenwe layiziphathamandla ezivele emahofisini enhlanganiso ezisebenzisana lozulu kanye labezigodlo zabammeli bamazwe aagoqela ele Bhilithani, Sweden, Canada, Tanzania, Nigeria lamanye.
Umculi owaziwa ngomculo ongathandwa nguhulumende kamongameli Robert Mugabe le Zanu Pf, u Hosiah Chipanga, nguye obelibazisa uzulu ecula ingoma ezibalisa ebibuza ngendlela umuyi, umka Joice Mujuru, uSolomon Mujuru, abhubha ngayo, etshiswa ngomlilo.
Your browser doesn’t support HTML5
Udaba Esilethulelwe NguMavis Gama