Abaphila lobugoga ngoLwesihlanu baphawule umkhankaso obizwa ngokuthi #Disability Sledge Hammer oqondiswe kuhulumende, idale lephalamende, abamabandla ezokholo lawezombusazwe, abaninibhizimusi labamankampnai ukuba, batholise amathuba ebantwini bakuloluhlangothi.
Umkhankaso lo uzaqhutshwa kusetshenziswa indlela ezehlukeneyo zokutshengisa ukukhonona lokusa incwadi yezikhalazo kuziphathamandla zize zizwisise ubunzima obubhekana labaphila lobugoga.
Umkhokheli walomkhankaso, uMnumzana Abraham Mateta, oligqwetha, utshele umhlangano lentathelizindaba eMedia Centre, ukuba leyosando ye “Sledgehammer ”, yindlela yokubonisa inguquko ezoba khona kundlela ezizosetshenziswa ukuzifinyelela iziphathamandla kunhlangothi ezehlukeneyo zempilo.
UMateta uthe sesedlula isikhathi sokube kuncenganwa, kungekho osekufezwe ngezokukhulumisana ebezisetshenziswa emuva.
Lanxa ukhona umthetho, wokulondolozwa kwelungelo labaphila lobugoga, omunye wabakulomkhankaso, umnumzana Masimba Kuchera uthe kawusebenzi.
Your browser doesn’t support HTML5
Udaba Esilethulelwe NguJoseph Njanji
Ukusetshenziswa kwesibonelo se sando “ Sledge Hammer ”, uKuchera uthe kungatsho ukuba bazoqhuba imikankaso yabo ngodlakela.
Abaphila lobugoga bathi sesifikile isikhathi sokubonisa inkokheli kuhulumende lezinye inhlangothi, ukuba baqakathekise loluhlangothi njengokutshiwo yizivumelwano abangena kizo ezamazwe omhlaba, ulungiswe lomthetho olawula phezu kwelungelo labo.