Abalandeli bomdlalo wenguqu bathi balethemba lokuthi iqembu elimela ilizwe emdlalweni wenguqu elamaWarriors lizadlulela phambili esigabeni esilandelayo esomncintiswano weAfrica Cup of Nations (AFCON) oqhutshelwa kwele Egypt, kulezinsuku.
Iqembu leZimbabwe libe ngutshiki lobhanqa 1 ka 1 lele Uganda ngoLwesithathu ntambama okuyimpumela etshiye iqembu leli lilomklomelo owodwa ngemva kwemidlalo emibili.
Phezu kwengalane yemiklomelo yesibaya sika Group A, kuleqembu leEgypt lona eselithole ilungelo lokudlulela kusigaba esilandelayo esomncintiswano ngemva kokuba litshaye ele DRC nge 2 ka 0 okutsho ukuba selilemiklomelo eyisithupha.
Iqembu leEgypt litshaye ele Zimbabwe nge 1 ka nya emdlalweni okuyiwo osungule umncintiswano walonyaka.
Endaweni yesibili kuhlezi iqembu leUganda lona elilemiklomelo emine ngemva kokuba litshaye ele DRC nge 2 ka nya emdlalweni walo wakuqala owesigaba sezibaya.
Umlandeli womdlalo wenguqu obukele umdlalo obuphakathi kweqembu leZimbabwe lele Uganda uSibonakaliso Ndlovu uthi iqembu leli lidlale ibhola elimthokozise kakhulu njalo lokhu kumupha ithemba elokuba benganqoba ele DRC emdlalweni wabo wesithathu njalo ungowokucina owezibaya.
“Nxa bengadlala ngendlela abadlale ngayo bedlala leqembu leUganda bengalitshaya iqembu le DRC ngoba badlale kuhle kakhulu kodwa babe lomnyama owokuba ibhola belisala ukungena emambuleni.”
Intathelizindaba yezemidlalo uNash Mkokwayarira laye uthi iqembu lama Warriors lilakho ukudlulela phambili nxa kukhangelwa indlela elidlale ngayo leqembu leUganda.
“Ama Warriors badlale kuhle kakhulu kodwa into abayiphambanisileyo yikuba basuke behluleka ukusebenzisa amathuba abawatholileyo. Loba kunjalo leliqembu lingaqhubekela phambili ngoba kulethuba elokuba iqembu eliphutshe lisendaweni yesithathu lalo lidlulele phambili yikho ke kumele ama Warriors anqobe iqembu leDRC ngoba lokhu kuzathuthukisa amathuba awokuba baqhubekele phambili.”
Amaqembu azaphutsha esendaweni ezimbili eziphezu kwengalane eziyisithupha azahle adlulele kusigaba esilandelayo esomcintiswano kodwa kuzakuba lamaqembu amane azaphutsha esendaweni yesithathu lawo azadlulela phambili ngoba ethole imiklomelo ethe xaxa.
Umlandeli weqembu lama Warriors uCaroline Dube uthi yena abaqeqetshi beqembu lama Warriors kuzamele badlale indima enkulu ekukhuthazeni abadlali babo ngoba abadlali laba bengathi kabazithembi nxa bengaba phambi kwegedi.
“Abagadli beqembu lama Warriors sebekhuthe kakhulu kumidlalo emibili asebeyidlalile njalo kuzamele bekhuthazwe ukuba bengajahi nxa bengazithola bephambi kwegedi ikanti lo Knowledge Musona kuzamele bamdlalise loba ekhuthe kakhulu emdlalweni abawudlale le Uganda.”
Imidlalo eyokucina eyesibaya sika Group A izadlalwa ngeSonto lapho iqembu leZimbabwe elizadlala khona lele DRC kuthi ele Uganda lizadlala lele Egypt.
Your browser doesn’t support HTML5
Udaba Esilethulwe NguJoseph Njanji
Your browser doesn’t support HTML5
Abadlali beqembu eleZimbabwe elamaWarriors baxoxa lenthathelezindaba eyeVOA