amalinks wokungena

Breaking News

Woza Friday: Indlikizane Yeqembu leSinazo


Kalanga Child

KuWoza Friday liviki sileqembu leSinazo, lona elisanda kwethula indlikizane ye-single ethiwa "Kalanga Child."

Iphekwe ngobunono bezinga laphezulu lingoma njalo ithe ngokwethulwa enkundleni zebulenjini ngoLwesibili uzulu wayeqela ngenjabulo enkulu.

Lingoma imemezela ukuzalwa komntwana ogama lakhe nguIndira esigabeni sakoMalaba, ePlumtree.

Ngubani ke lumntwana othe ngokubelethwa kwabonakala izazi zilandela inkanyezi zilubhekise koMalaba?

"Igama leli elithi Indira ligama lesiNdiya," kuchasise umkhokheli weSinazo uTitshabona Malaba ohlala eUnited Kingdom, onguye njalo olobe lingoma.

"Ngicabanga ngikhula, uMama wayethanda ukusifundisa ngendaba zikaIndira Ghandhi, yikhoke igama leli lahlala engqondweni yami kakhulu. Ngathi ngithola ingane ngayinikeza ke igama elithi Indira."

please wait

No media source currently available

0:00 0:07:35 0:00
Lapho esitholakala khona

Yebo uthakazelela ukuzalwa komntanakhe uMalaba, kodwa mbiko bani azama ukuwufikisa emphakathini?

"Sizama ukubonisa abantu ukuthi ukuzalwa komntwana esikweni lesiKalanga kuqakatheke okunganani," uqhubeke echasisa okaMalaba.

Indlikizane le ilandela enye njalo i-single yaleliqembu ebitshisa okwesihogo, ephume ekuqaleni komnyaka ethiwa "Bukalanga."

Le ke yingoma yendulo ebihlatshelwa ngabosendo lwesiKalanga, begiye kube luthuli beziqhenya ngosendo lwabo.

Kodwa iqembu leli liyithethe layilolonga, layixubanisa lezigxingi zesimanjemanje kwaphuma uluju lwehouse.

Leliqembu libunjwe ngo2013 lahle lethula idlalade lalo lakuqala elithiwa “Inyatsi.” Elesibili liyeza ngoZibandlela kumbe ngoNhlolanja.

UMalaba ucele uxhaso kuzulu esithi lokhu kuzabapha umdlandla wokuqhubeka bepheka ezimnandi.

"Uma lingasisekeli sifana nje lenqola engela masondo, siyatshaya sindawonye singahambi. Kodwa ma lisisekela, siyaqhubeka silamadlabuzane," kutsho uMalaba.

UKalanga Child izaqala ukutholakala ezitolo zebulenjini ngeviki ezayo enkundleni ezigoqela iItunes, Amazon, Google Play, Spotify lezinye.

Okwanje itholakala mahala enkundleni yeSound Cloud. Yisipho sekhisimusi ngempela!

XS
SM
MD
LG