Ababalisi beZimbabwe babambane labanye babo emhlabeni jikelele ngoLwesine ekunanzeni usuku lokuqakathekisa umsebenzi wabo, eleWorld Teachers’ Day.
Abanengi babo bebekhala ngeholo eliphansi njalo besithi uhulumende kahloniphi amalungelo abo.
Inhlanganiso emela ababalisi bemaphandleni iAmalgamated Rural Teachers’ Union of Zimbabwe yethule umbiko ichothoza umphathintambo wezemfundo isithi uyehluleka umsebenzi.
Inhlanganiso le ithi uMnu Lazarus Dokora sebulale kakhulu ezemfundo ngemithetho yakhe aqhubeka eyethula lanxa nje ababalisi bengavumelani layo.
Ukungabhadalwa kuhle sokubangele ukuthi ababalisi abanengi basuke eZimbabwe bayedinga imisebenzi kwamanye amazwe.
Omunye wabo nguMnu Khuli Mathulela Sibanda ofundisa kwesinye isikolo eJohannesburg kweleSouth Africa.
USibanda utshele umsakazo weStudio 7 ukuthi uyawuthakazelela umsebenzi wakhe.
Kodwa uthi okudanisayo ngeZimbabe yikuthi ababalisi abanengi sebesukile elizweni ngenxa yokuzamazama komnotho bayadinga imisebenzi kwamanye amazwe.
Ngaleyondlela, uMnu Sibanda uthi izinga lemfundo yamazwe la liqhubeka liqongwa kanti eZimbabwe liyehla mihla lamalanga.
