Lanxa uMongameli Emmerson Mnangagwa ethembise ukucanda indlela ecacileyo ezakhokhelela ekhethweni olukhululekileyo, esinye isiphathamanda seMelika sithi akulalutho oluzwayo aselwenzile.
Omunye wamalunga ephalamende yaseMelika ake ethekelela eZimbabwe ahlangana loMnangagwa ngenyanga edluleyo uSenator Chris Coons uthi bakhathazekile kakhulu ngalokhu.
UCoons uthi emhlanganweni abawenza loMnangagwa lezinye izicukuthwana zikahulumende weZimbabwe, uMnangagwa wathembisa ukuthi uzaletha inguquko kundaba zamalungelo oluntu kanye lasemithethweni ethinta ukhetho.
Kodwa uthi lanxa ukhetho solusondele, akulaluthi uMnangagwa aselwenzile ukugcwalisisa izithembiso zakhe, okungenza njalo iMelika yesule izijeziso zenotho eyazethesa uhulumende weZanu PF.
UMnu Coons uthi uhulumende engahlonipha amalungelo oluntu njalo eqhube ukhetho olusuthisayo, yena labanye bakhe eMelika abaphatheke ngodaba lweZimbabwe bazathatha amanyathelo okwesula lezizijeziso.
Olwela amalungelo oluntu njalo eyisizalwane seZimbabwe esihlala eBhilithani uMnu Difa Dube uvumelane loCoons ekuthini ngempela imithetho yezokhetho isadinga ukuguqulwa.
Ngaphandle kwalokho, uMnu Dube uthi ukhetho oluzayo kalusoze lube ngolukhululekileyo.
