Umsekeli kanobhala obona ngobudlelwano beMelika lamazwe aseAfrica uMnu Matthew Harrington uthi kubalulekile ukuthi eleZimbabwe liqhube ukhetho olukhululekileyo ukuze kube lobudlelwano obuhle phakathi kwalo leleMelika.
UMnu Harrington wethule amazwi la ekhuluma lentathelizindaba eseHarare ngoLwesine kuhambo lwakhe lwensuku ezimbili. Uthe uhulumende weMelika uzimisele ukusebenzelana lohulumende weZimbabwe.
Wengeze wathi ukuze ukhetho lube ngolukhululekileyo, wonke amabandla ancintisayo kumele aphiwe ithuba elifanayo emaphephandabeni lasemisakazweni kahulumende njalo evunyelwe ukukhankasa ekhululekile.
UHarrington uthe kuqakathekile njalo ukuthi uhulumende kaMongameli Emmerson Mnangagwa ehloniphe amalungelo oluntu lombuso wentango kazulu.
Zinengi izicukuthwane zaseMelika esezethekelele eZimbabwe phakathi kwenyanga eziyisikhombisa ezedluleyo kulandela ukugenqulwa kombuso kaRobert Mugabe nyakenye.
Ingcwethi ecubungula ezombusazwe uDr. Brilliant Mhlanga utshele iStudio 7 ukuthi uvumelana lamazwi kaHarrington, ikakhulu kudaba lokuhlonitshwa kwamalungelo oluntu nguhulumende.
