WASHINGTON DC —
Obengumeli wesigaba seMatabeleland South edale leSenate uNkosikazi Sithembile Mlotshwa ungcwatshiwe emzini wakhe eMatobo ngoMgqibelo.
UMaMlotshwa, yena obelilunga leMDC-T, ubhubhele esibhedlela seUnited Bulawayo Hospitals ngeviki edluleyo ngemva kokugula okwesikhathi eside.
Uphelekezelwe ngabantu abanengi abagoqela abamacele womabili eMDC-T.
UMaMlotshwa ubedume kakhulu ngokulwela amalungelo abesifazana, uzulu wemaphandleni kanye labantu abaphila legciwane leHIV.
Umgcinisihlalo weMDC-T ekhokhelwa nguNkosazana Thokozani Khupe, uMnu Abednico Bhebhe, utshele iStudio 7 ukuthi abantu abanengi abakhulumileyo emngwabeni bachaze uMaMlotshwa njengeqhawe lamaqhawe.