Inkampani yeSchweppes Zimbabwe ithi isiphendukisa inamnende leMazoe eliyisitapitapi ngemva kokukhonona kwabathengi besithi inamnende elehliswe itshukela eliqale ukuthengiswa yinkampani le kunsukwana ezedluleyo bebengalithakazeleli.
ISchweppes, yona esebenza iphansi kwenkampani yeCoca-Cola, ibingasathengisi iMazoe ejayelwe ngabanengi eletshukela enengi ngoba isithi ilakho ukubangela imikhuhlane efana le-diabetes.
Ngokunjalo, inkampani le ibisithengisa inamnede eliletshukela eliphansi kuphela.
Kodwa uzulu uvuke ubhova wakhonona kakubi esithi inamnede elitsha leli kalifuni ngoba lingamnandi.
Lokhu kwenze iziphathamandla zeSchweppes Zimbabwe lezeCoca-Cola zahlala phansi zaphuma lesinqumo sokuphendukisa inamnede eliyisitapitapi leli.
Lanxa kunjalo, inamnede eliletshukela eliphansi lizaqhubeka lithengiswa ukuze abantu bazikhethele, kwazise iSchweppes embikweni ewethule ngoLwesithathu.
Ukuhlaziya loludaba, sixoxe lengcwethi kwezokudla uMnu Romeo Bhebhe yena oxwayise uzulu ukuthi atshiyane lezitapitapi ngoba zibangela imikhuhlane.
UBhebhe uncome iSchweppes ngokulungisa inamnende eliletshulela eliphansi esithi lehlisa ingozi yokuhlaselwa yimikhuhlane.
