Kudubuke ibhomba eliphose labulala uMongameli Emmerson Mnangagwa enkundleni yeWhite City koBulawayo ngoMgqibelo lapho aqhubele khona umhlangano wokukhankasela ukhetho.
Uthe usuphelile umhlangano uMnangagwa esesehla esitejini ladubuka lelibhomba duzane laye. Libikwa libulele abasekeli beZanu PF abambalwa.
Umsakazo weStudio 7 awenelisanga ukukhuluma lamapholisa ngesehlakalo lesi.
Kodwa abalimeleyo bagoqela umsekeli kaMnangagwa uMnu Kembo Mohadi, uMnu Engelbert Rugeje, uNkosikazi Oppah Muchinguri, umkakhe kaMnu Constantino Chiwenga labanye.
Bonke laba balaliswe ezibhedlela zakoBulawayo ezigoqela eseMater Dei leseMpilo.
Ekhuluma ngemva kwengozi le, uMnangagwa uthe ibhomba leli lithiywe yizitha zakhe ebezizama ukumbulala ngemva kokwehluleka ukumqeda ngetshefu nyakenye.
Wengeze wathi uzulu wakoBulawayo akalani lokwenza lesiga lesi.
Omunye obesemhlanganweni lo olilunga leZanu PF uMnu Believe Gaule utshele iStudio 7 ukuthi ngempela bakhona abafileyo lanxa ebengeke atsho ukuthi bangaki.
“Engingakutsho yikuthi bakhona sibili abafileyo kodwa angikwazi ukuthi bangaki. Isehlakalo lesi singethusile njalo lakhathesi amehlo ami kaboni kuhle ngiyabona ngingenwe yintuthu,” kutsho uMnu Gaule.
Abamabandla aphikisayo basole isehlakalo lesi besithi silakho ukuphambanisa ukhetho.
“Kukhanya angani bonaba abaganga besenza izinto zonezi ngiyabona ngabalenjongo yokuphambanisa ukhetho ukwenzela ukuthi kuqalise ukuba lama-excuses okwenza ama-security clampdown ezweni,” kutsho umkhokheli weMDC uMnu Welshman Ncube.
Umbuzo omkhulu osemilonyeni yabantu abanengi ngothi kahle-kahle ngubani obezama ukubalala uMnangagwa?
“Lo ngumsebenzi wangaphakathi kweZanu PF. Ukulwela amandla kwabo kuyaqhubeka njalo kusazoba kubi. Lisazochitheka igazi,” kutsho ingcwethi kwezombusazwe uMnu Dinizulu Macaphulana.