Kuqhamuke udlakela olubangele ukuvalwa kwesitolo esikhulu sePick n Pay koBulawayo ngoLwesine.
Udlakela lolu luqhamuke ngesikhathi abantu abake basebenzela isitolo lesi betshengisela besithi siqhatshwa abantu abavela eMashonaland kuphela.
Bebesithi njalo izisebenzi ezikhuluma ulimi lwesiNdebele kumbe ezivela eMatabeleland zixotshwa njalo nje yiziphathamandla zesitolo lesi.
Abatshengiseleyo laba bathi labo baxotshwa kulesisitolo ngoba bekhuluma isiNdebele. Asenelisanga ukuzwa ukuthi bakhona yini ababotshiweyo.
Amalunga ebandla eliphikisayo elikhankasela ukwehlukaniswa kwelizwe eleMthwakazi Republic Party lawo aphathekile kulokhu kutshengisela.
Olwela amalungelo oluntu uMnu Difa Dube utshele iStudio 7 ukuthi udaba lwezisebenzi eziqatshwa eMatabeleland zivela phandle kumele lukhangelisiswe ngoba lulakho ukuphehla udlakela elizweni.
