Izakhamizi zakoBulawayo sezicele iziphathamandla ukuthi zivule amakiliniki ekhansili ngaso sonke isikhatho ukuze abantu bathole ukwelatshwa yiloba nini.
“Ukugula akuhlaleli, kungumbono omuhle ukuthi amakiliniki avulwe 24/7,” kutsho isakhamuzi uMnu Vincent Khumalo, lanxa nje evuma ukuthi imali yokubhadala izisebenzi yiyo engahlupha.
Esinye njalo isakhamuzi uMnu Kembo Mpofu laye uthe ikhansili ilomlandu wokuvula amakiliniki ngaso sonke isikhathi.
“Ikhansili ivele ilamanye amakiliniki engawavaliyo, akubenjalo lakwamanye; kungumqondo omuhle ukuthi wonke amakiliniki avulwe ngoba ukugula akulasikhathi,” kutsho uMpofu.
UMayor walelidolobho, uMnu Martin Moyo, uvumelane lezakhamizi esithi zilombono omuhle kakhulu lobanje kulenkinga ezinengi umasipala abhekane lazo.
“Kudingakala imali labantu abazasebenza,” kutsho uMoyo. Kodwa okwamanje kusasenzima ngoba asilakho okudingakalayo; akhona amanye amakilinika ethu angasebenziyo eMahatshula lasemalokitshini ngenxa yokungabi labongikazi.”
UMnu Moyo wengeze wathi ngaphandle kokusilela kwemali lezisebenzi, bavele bamiswa nguhulumende ukuqhatsha izisebenzi.
