Umgcinisihlalo wekomishini ebona ngokuqhutshwa kokhetho, iZimbabwe Electoral Commission (ZEC) uNkosazana Priscilla Chigumba uselandule ukuthi uthandana loMongameli Emmerson Mnangagwa.
Sokulesikhathi eside kulehungahunga elithi uChigumba engaba elidlalicatsha likaMnangagwa, yikho nje eqhuba umsebenzi angani weyamele kucele leZanu PF.
Kodwa ekhuluma emsakazweni weStar FM izolo ntambama uNkosazana Chigumba uthe lanxa udaba lokuthi uthandana lobani lungelani lomphakathi, kungamanga aluhlaza ukuthi uqome “omunye wabancintisa kukhetho lukaMongameli.”
Kazange amqambe ngebizo uMnangagwa.
Ebuzwa ngesikhava seZanu PF ake wabonakala esembethe komunye umfanekiso, uChigumba uthe umfanekiso lo wathathwa engakabi ngumgcinisihllao weZEC.
Ukulandule njalo ukuthi yisikhava seZanu PF esithi wayesiphiwe ngumasithunga edinga uxhaso lwakhe.
Ingcwethi ehlaziya ezombusazwe uDr. Brilliant Mhlanga utshel iStudio 7 ukuthi nxa yubudlelwano bukaMnangagwa loChigumba bungobeqiniso, yinto embi kakhulu.
