amalinks wokungena

Breaking News

Impumela Yokhetho lukaMongameli Iyeza Namuhla Ngehola Letshumi Ebusuku


UMnu Nelson Chamisa loMongameli Emmerson Mnangagwa

Ikomishini ebona ngezokhetho ithi izaqala ukwethula impumela yokhetho lukaMongameli namuhla ebusuku ngehola letshumi, 10pm.

Lokhu kuvezwe yisikhulumeli seZimbabwe Electoral Commission (ZEC) kumizuzwana edluleyo uMnu Qhubani Moyo.

Impumela le ikhangelelwe nguzulu weZimbabwe kanya lomhlaba jikelele ngamehlo abomvu.

Oncintise kukhetho lolu emele umanyano weMDC Alliance uMnu Nelson Chamisa utshele intathelizindaba eHarare namuhla emini ukuthi nguye onqobileyo.

Uthe njalo iZEC ingethula impumela emveza enqotshiwe akasoze akwamukele lokho ngoba kuyabe kube lokuqilibezela.

“Nginqobile kukhetho lukaMongameli. Kukhetho lwamalunga ephalamende singathi basinqobile kodwa kolukaMongameli ngimtshayile uEmmerson Mnangagwa,” kutsho uChamisa.

UMnu Chamisa ubekhuluma ngesikhathi esethekelela abantu abalinyazwe ngamasotsha ekutshengiseleni kwamalunga eMDC Alliance izolo.

Abantu laba balaliswe esibhedlela seParirenyatwa njalo bayisikhombisa. Ababili belatshiwe bakhululwa.

UChamisa uhlangane njalo lezihlobo zabantu abathathu abadutshulwe babulawa ngamasotsha. Uthe ukhala ndawonye lemuli zabafi njalo wasola ucuku lolu.

Impumela yokhetho lwamalunga edale lephalamende isiphumile yonke njalo ibandla leZanu PF lithole izihlalo ezilikhulu lamatshumi amane lane, 144 kwathi iMDC Alliance yathola ezingamatshumi ayisithupha lane, 64.

Ibandla leNational Patriotic Front lithole esisodwa kwathi esinye saya kulunga elizimeleyo uMnu Themba Mliswa.

Facebook Forum

XS
SM
MD
LG