UMongameli Emmerson Mnangagwa ufungise amalunga edale lakhe labaphathintambo (Cabinet) ukuqala umsebenzi ngoMvulo.
Abaphathintambo laba bagoqela owezemali uMnu Mthuli Ncube yena okhangelelwe nguzulu weZimbabwe ukuthi asungule inhlelo ezizavuselela umnotho.
Ekhuluma ngemva kokuthatha isifungo, uNcube uthe kunengi okumele kwenziwe okugoqela ukubhadala izikwelede zelizwe ukuze umnotho uncibilike.
“Ukusilela kwemali emabhanga kuveza sobala ukonakana komnotho. Ngizahlala phansi loMongameli Mnangagwa sibonisane ukuthi singalulungisisa njani loludaba,” kutsho uMnu Ncube.
UMongameli Mnangagwa ukhethe abaphathintambo abangamatshumi amabili ngoLwesihlanu kanye labasekeli babo abalitshumi lantathu.
Intshantshu kwezokubhukutsha njalo engosakhulayo uNkosikazi Kirsty Coventry ukhethwe ukuba ngumphathintambo wezabatsha lezemidlalo njalo ungomunye wabafungisiweyo ngoMvulo.
Omunye njalo osakhulayo uMnu Nqobizitha Mangaliso Ndlovu, ongumphathintambo wezokuthengiselana uthembise ukusebenza nzima ukugcwalisa izifiso zikazulu.
“Nxa linanzelele kucabinet kulabatsha ababili, kuyasijabulisa thina lokho,” kutsho uNdlovu ekhuluma lomsakazo weStudio 7.
“UMongameli ungiphe ugatsha olulobunzima kodwa nxa ngikhangela, ubone ukuqakatheka kokuthi abatsha babe lesabelo ekuthini sithuthukisa njani umnotho.”
