Osanda kukhitshwa esikhundleni sikamphathintambo obona ngezempilakahle uMnu David Parirenyatwa ubotshiwe goLwesine wamiswa emthethwandaba esetheswa icala lenkohlakalo.
UMnu Parirenyatwa uphange wakhululwa ngemva kokuvunyelwa ngumantshi ukuhlawula imali yesibambiso engamadola angamakhulu amahlanu.
Uzaphenduka enkantolo mhaka 26 ngenyanga ezayo.
UParirenyatwa wetheswa icala lokulaya inkampani yeNational Pharmaceutical Company of Zimbabwe ukuthi isuse umqondisi wayo uNkosikazi Flora Nancy Sikefu esikhundleni ifake uMnu Newman Madzikwa.
Abatshutshisi bathi uMnu Parirenyatwa wenze lokhu ngaphandle komthetho esebenzisa amandla akhe njengomphathintambo kahulumende.
UParirenyatwa ngomunye weziphathamandla zeZanu PF ebezingabaphathintambo kuhulumende osanda kwedlula ezingenelisanga ukungena kuhulumende omutsha.
Uba njalo ngomunye wamalunga ebandla leZanu PF ake aba ngabaphathintambo asebotshelwe amacala enkohlakalo agoqela uMnu Ignatias Chombo.
Ingcwethi kwezombusazwe uMnu Rejoice Ngwenya utshele iStudio 7 ukuthi ukubotshwa kukaParirenyatwa yedwa akutsho lutho ngoba bebanengi abantu abengethembekanga kuhulumende abamele babotshwe.
