amalinks wokungena

Breaking News

AmaMighty Warriors Aphelelwa Ngumphako Kumidlalo yeCOSAFA


Iqembu leZimbabwe elama Mighty Warriors.

Iqembu labesifazane elimela ele Zimbabwe emdlalweni wenguqu seliphelelwe ngumphako kumncintiswano walonyaka owe COSAFA oqhutshelwa kwele South Africa.

Iqembu le Zimbabwe liphutshe imidlalo yalo eyezibaya lisendaweni yesibili engalaneni yesibaya sika Group C lilemiklomelo eyisithupha kuthi ele Uganda yilo eliphutshe lisendaweni yakuqala lilemiklomelo eyisikhombisa.

Limpumela itsho ukuba iqembu le Uganda yilo elihle lathola ilungelo elokudlulela kusigaba esilandelayo esomncintiswano ndawonye lele South Africa eliphutshe lisendaweni yakuqala kusibaya sika Group A, ikanti kusibaya sika Group B kuphumelele amaqembu amabili abalisa ele Zambia lona elihlezi phezu kwengalane lilemiklomelo eyithoba munwe munye kanye lele Cameroon eliphutshe lisendaweni yesibili lilemiklomelo eyisithupha.

Iqembu le Cameroon lele Zimbabwe aqede imidlalo elemiklomelo elingeneyo kodwa umehluko ubesekutheni iqembu le Cameroon lihlohle amagoli amanengi kulele Zimbabwe yikho ledlulele kusigaba se semi - final.

Iqembu le Zimbabwe linqotshwe ku final emncintiswaneni wanyakenye oqhutshelwe kwele Zimbabwe lapho elafinyelela khona kusigaba se semi – final ngemva kokuba kube yilo eliqede lisesimeni esihle kumaqembu aphutsha imidlalo yezibaya esendaweni yesibili kodwa lonyaka kwehlule.

Olandela umdlalo wenguqu uSibonakaliso Ndlovu uthi ukungaphumeleli kweqembu le Zimbabwe kuveza ukuba sekumele kuzanywe abadlali abasakhulayo.

Kutsho uNdlovu: “Mina ngibona kudliwe umqeqetshi ngoba emdlalweni wakuqala wafaka abadlali esibajwayeleyo bathwala nzima ukunqoba iqembu le Namibia kodwa kowesibili udlalise abadlali abatsha batshaya kabuhlungu iqembu le Swaziland ikanti emdlaweni wesithathu ubisele labana abavele bejwayele ukudlala behluleka ukunqoba ele Uganda. Ngokubona kwami abadlali abanye sekumele bethathe umhlala phansi ngoba sekusobala nje ukuba sebetshonelwe lilanga.”

Amaqembu abefakwe kuzibaya ezintathu okutsho ukuba amaqembu amathathu aqede ehlezi phezu kwengalane yiwo ahle edlulela kusigaba se semi – final lapho iqembu le Cameroon elizadibana khona lele Zambia kuthi ele South Africa lizadlala lele Uganda.

Kusasa amaqembu azahlaba ikhefu kuthi imidlalo ye semi – final iqhubekele phambili ngoLwesine kuthi umdlalo wokudinga iqembu elizaphutsha lisendaweni yesithathu uzadlalwa ngoLwesihlanu ikanti ifinal izadlalwa ngoMgqibelo.

please wait

No media source currently available

0:00 0:02:04 0:00

Facebook Forum

XS
SM
MD
LG