Namhla kuhlelo lwethu lapho esixoxa khona ngendlela eyavotwa ngayo yizakhamizi zeMatabeleland lako Bulawayo lokuthi kanti vele kungani izakhamizi zavota ngendlela ezivota ngayo sixoxa lomkhokheli webandla le Mthwakazi Republic Party, uMnu. Mqondisi Moyo.
Ibandla leMthwakazi elancintisa ezigabeni zeMatabelaland lako Bulawayo lanqoba esigabeni sinye kuphela sobukhansila edolobheni le Victoria Falls.
UMoyo uthi esigabeni seMatabeleland kwaba lokuqilibezela okwedlula ezinye izigaba zelizwe.
“Impumela yokhetho ayitshengiseli ukuthi abantu bakithi baphike abantu abanjengathi bavotela iZanu PF. Ngikhuluma nje izolo bengise Matobo North ngibizwe ngabadala kwezinye izabelo laphana bathi bayamangala ukuzwa ukuthi iZanu PF inqobile ngoba ngikwanisile ukubhoda amaward amathathu. Bathi bayamangala ukuthi iZanu PF ingqobile ngoba bona abayivotelanga iZanu PF,” kutsho uMoyo.
Uthi bayananzelela ukuthi iZanu PF yenze imizamo yokuthi abantu abanjengabo abafuna ukuthi izabelo zizibuse bengangqobi ezabelweni zabo. Uthi lokhu kutshengisa ukuthi ibandla leZanu PF liqilibezele njengalokho elakwenza ngomnyaka ka 1980.
“Abantu bamangala namhlanje ukuthi iZanu PF iyariga, especially abantu beMashonalanda abagoqela uChamisa. IZanu PF iqale ukuriga ngomnyaka ka 1980 iqilibezela umuyi uMnu. Joshua Nkomo,” kutsho uMoyo.
Uthi ngoba abafuni ukuthi isigaba seMatabeleland siphumelele kodwa uthi kunzima ukuthola ubufakazi bakhona kodwa uthi kulesi sigaba yikho okwaqilibezelwa khona kakhulu.
