Ezinye izizalwane zeZimbabwe ezihlala eBhilithane ziyafa ngemikhuhlane efana lengculaza kanye lemvukuzane ngenxa yezixwayiso eziziphiwa ngabafundisi benkozo zazo ezokuthi zinganathi amaphilisi ngoba zizasiliswa yimithandazo.
Kuvamile kulezinsuku ukuzwa kuthiwa abafundisi balamandla okusilisa abantu abagulayo ngemithandazo kuphela kukanti abanye balabo okuthiwa ngabaprofethi bathi izigulani zilahle imithi eziyiphiwa ngodokotela. UMnu Dumi Mabeka ngomunye wabaphila legcikwane leHIV owayeselahle amaphilisi.
Kutsho uMabaleka: “Mina ngikhathazwa yisifuba njalo bengisehlelweni okweminyaka engu 12 but ngabuya kulichurch kwathiwa ngingasanathi amaphilisi egcikwane ngumprofethi. Kuthe ngoJuly lonyaka sengihlale nearly 2 years nginganathi ngawa ngasiwa esibhedlela. Manje isimo sami sesisibi ngiyazisola ngalandelelani umprofethi.”
UNkosazana Vimbai Shoko yena ulomkhuhlane wemvukuzane, iCancer. Laye wayesejikijele khatshana imithi kadokotela.
“Ngabanjwa umkhuhlane weCancer ngo2017 April. Omunye umzalwane wangirifeya kwelinye ipostoli lechurch yakhe. Ubaba lo wangisa emanzini engigezisa wacina engitshela ukuthi ngilahle amaphilisi ami ecancer njalo ngingayi kuChemo. Uyazi kwahla kwaba worse and my cancer spread very fast. lm back ku chemo kodwa ngiphiwe less than 2 years to live,” kutsho uShoko.
Umprofethi odume kakhulu eNgilandi owazakala ngokuthi The Servant of God uMnunzana Mpuphu owe 12 Apostle Church kavumelani labafundisi abalisa abantu ukunatha amaphilisi emikhuhlane.
“Ngicela bonke abantu abagula lesisifo, bengatshelwa amanga ngamakholwa athi wona sengikukhulekele iHIV wayiphila. Mina ngiyakhulekela abantu futhi ngiyakholwa umkhuleko uyasebenza. Nxa umuntu esithi sekusilisile iHIV kumele uhambe uye testa igazi ubone ukuthi ngempela isiphelile and then ma ubone isiphelile ke sungukhuluma ngokuthi ususilisiwe,” kutsho uMpuphu.
UMpuphu ukhuthaze abantu ukuthi batshiyane lokulandela abafundisi bebenza oNkulunkulu kodwa kabafunde ukulandela imbhalo yebhayibhili.
“Ibhayibhili kuRevelations ithi all liars won’t see heaven. Khathesi umuntu uyatshelwa ukuthi kholwa ukuthi ususilile lawe uthi hayi sengislile kodwa still you are in pain. Phola first kupain then ususitsho ukuthi sengisilile, yikho ukukholwa kweqiniso okutshiwo yibhayibhili. Yes ngiyazi ukuthi kulama statements esiwa interpreter ukuthi we walk by faith yes we walk by faith but ipain ayihambe through faith,” kutsho uMpuphu.
Abantu abanengi abazithi ngabaphrofethi sebememetheke indawo yonke njalo abanengi babo bathi bayakhulekela abagulayo baphile kukanti imkhuleko yakhona iyabhadalelwa.
Ingcwethu kwezempilakahle zithi umkhuhlane lomkhuhlane kumele welatshwe ngephilisi lomuthi elenzwele lowo mkhuhlane; hatshi ngokubamba abantu emakhanda lokubanathisa amanzi, kuthiwe igcikwane selifile.
