Asedlulele kusigaba samaQuarter Finals omncintiswano walonyaka weChibuku Super Cup amaqembu enguqu amakhulu abalisa eleHighlanders, eleCAPS United kanye leleDynamos.
Amanye njalo asengene esigabeni lesi abalisa iChapungu, iHarare City, iHerentals, iNichrut leTriangle United.
Kodwa amaqembu alwisa ukuphakamisa isicoco sePremier Soccer League abalisa eleFC Platinum leleNgezi Platinum ahle aphelelwa ngumphako.
Umncintiswano lo uqale ngoLwesihlanu lapho iqembu leHarare City eligumule khona eleBulawayo City ngemva kokulinqoba nge1 ka nya.
NgoMgqibelo iqembu leBlack Rhinos likhutshwe ngeleNichrut, lona elinqobe nge2 ka 1. IDynamos idlulele phambili ngemva kokutshaya iBulawayo Chiefs nge1 ka 0.
NgeSonto iHighlanders leCAPS United asile ngesikhala senalithi njengoba iBosso inqobe iYadah umdlalo ususiya komlindi uyacina ngemva kokuba izivakatshi zikhokhele okwesikhathi eside emdlalweni obuseBarbourfields.
IMakepekepe yona inqobe iZPC Kariba nge5 ka 4 ngemva kokutshaywa kwembekwa.
Ekhuluma lentathelizindaba ngemva komdlalo, umqeqetshi weHighlanders uMadinda Ndlovu uthe okuqakathekileyo yikuba abafana bakhe kangenile kumaQuarter Finals eChibuku Super Cup.
“Asidlalanga ibhola lethu lansukuzonke kodwa okuqakathekileyo yikuba abafana benelise ukulwisa baze banqoba okuyikho okuqakathekileyo kumidlalo efana lale ngoba okusemqoka yikuba sidlulele kusigaba esilandelayo esomncintiswano,” kutsho uMadinda.
Iqembu leHighlanders, eleDynamos leleCAPS United yiwo alandelwa ngabantu abanengi eZimbabwe kodwa lonyaka awaselawo amathuba okuphakamisa inkezo yePSL.
Yikho nje abanengi sebekhangelele kunkezo yeChibuku Super Cup, yona elemali enengi kuzo zonke ezidlalelwa ngamaqembu adlala kuPSL.
