UMongameli Emmerson Mnangagwa uzakwethula amazwi akhe akuqala njengoMongameli weZimbabwe emhlanganweni weUnited Nations General Assembly kuhola elilandelayo inengi, eZimbabwe lasemhlabeni jikelele limelele ukuzwa umbiko wakhe.
Lanxa kungazakali ukuthi umbiko wakhe uzagxila kuziphi indikimba, inengi lithi kalikhangelelanga ukuthi ahambe ngonyawo lukaMnu Robert Mugabe, yena owayedume ngokuthuka inkokheli yeBhilithani leyeMelika njalo-nje kulumhlangano.
“Alilamahloni, alilamahloni. Sithi alilamahloni kulizwe leMelika. Alilamahloni kulizwe leBhilithani labangane benu ngokusethesa izijeziso,” wakhwaza uMugabe ngomnyaka ka2016 emhlanganweni weUN.
Okunye ayedume ngakho okusekelwa ngabakhokheli bamazwe eAfrica ludaba lokuthi ugatsha lomvikela olweUN Security Council kumele luguqulwe lube lamalunga angamazwe eAfrica.
Ngomnyaka odluleyo uMugabe uchothoze uMongameli weMelika uMnu Donald Trump kulumhlangano esithi ungumkhokheli ophehla inzondano lengxabano emhlabeni.
UMnangagwa yena udaba lwezijeziso ezetheswa uhulumende weZanu PF yiMelika, iBhilithani lomanyano weEuropean Union seke waluphatha kwezinye inkundla esithi isikhathi sokuhlaba umkhosi ngezijeziso lezi sesadlula.
Kambe kuyini esingakukhangelela embikweni wakhe namuhla? Nansi ingcwethi ehlaziya ezombusazwe uMnu Effie Dlela Ncube.
“Awusoze uzwe inhlamba, awusoze uzwe uTony Blair kumbe uBush kumbe iMelika; awusoze uzwe ekhuluma ngama-sanctions. Uzakhuluma ngalokho okutsha osokukhona,” kutsho uMnu Ncube.
“Ngicabanga ukuthi uzaba esenza lokhu okuthiwa ngesikhiwa to resert relations esenzela ukuthi abonakale engumuntu ohlukane loMugabe.”
Ilunga leZanu PF elihlala eMelika uMnu Kelvin Manduna utshele iStudio 7 ukuthi uMnangagwa uyakunanzelela ukuthi abantu bafuna inguquko ngoba sokuleZimbabwe entsha.
Inkokheli yamazwe omhlaba etshiyeneyo layo izabe ilalele umbuko kaMnangagwa ngendlela ezibukhali ukuze izwe ukuthi ngempela wehlukene loMugabe yini kumbe zimbila zantabanye.
UDr. Nkululeko Sibanda, isikhulumeli somkhokheli weMDC uMnu Nelson Chamisa uthe bona njengebandla akulalutho olubambekayo abalukhangelele embikweni kaMnangagwa.