Intathelizindaba yeStudio Seven, uMarvelous Mhlanga Nyahuye ngomunye wabathole isicoco emcimbini wokunanza imisebenzi yezizalwane zeZimbabwe ezihlala kweleMelika phansi komkhankaso we Zimbabwe Achievers Award.
Lo ngumbuthano wesithathu eMelika lanxa usuleminyaka embalwa kwamanye amazwe abalisa ele Bhilitane, South Africa lamanye.
Kade kulamahlandla atshiyeneyo lapho kade kuphiwa izicoco kusiya ngokuthi okhethiweyo wavotelwa ngabantu abangaki ebulenjini.
Umhlanga Nyahuye uphiwe isicoco kusigaba sokuba yintathelizindaba esebenze kunkundla zokuxhumana ebulenjini, isocial media.
Osisi abathengisa amacimbi lokunye ukudla okuvela eZimbabwe besebenzisa ubulembu, abe ZimTuckshop labo bathole isicoco.
Kuthi kusigaba sowesifazane oqhube kahle ibhizimusi kweleMelika uNkosikazi Thabisile K Francis nguye ophiwe isicoco.
Kwabesilisa abenze ibhizimusi okubukekayo, uMnu. Steve Mutizwa nguye othole isicoco se Male Entreprenuer Of The Year.
Otshengise ubungcitshi kwezemfundo nguDokotela Chipo Dendere.
UPastor Chaka Ngwenya kunye loTino Chambati yibo abathole isicoco sokulibazisa uzulu ese Outstanding Achievement in Entertainment.
Osedumile umhlanga wonke ngokuqumbaqumba uzulu, uAlfred Kainga uthole isicoco sokulibazisa uzulu. Ukainga ubengekho kulumcimbi ngoba kuthiwa use Nigeria lapho ahlekisa khona izizalwane zalelolizwe.
Umanyano wabomama, owe Women of Dominion uphiwe isicoco sokuba yinhlanganiso ehlelekileyo.
UNkosikazi Portia Kandemirii yena uthole isicoco sokuba ngumuntu othwandwa ngumphakathi.
Kulabanye njalo abambalwa abaphiwe izicoco phasi kwesahloko sabahloniphekayo, ihonorary award.