Umanyano wamabandla ezokholo, owe Zimbabwe Council of Churches uthi uphakathi kwemizamo yokuthi umkhokheli webandla leMDC, uMnu. Nelson Chamisa akhulumisane loMongameli Emmerson Mnangagwa.
Kodwa akucacanga ukuthi inkulumo lezi ngezokuthi basebenzelane njani.
Lokhu kuphume emhlanganweni owenzwe yinkampani ye Alpha Media Holdings ngoLwesithathu phakathi kwabezokholo labakumabhizimusi.
UChamisa uyala ukuthi uMnangagwa wangqoba kukhetho njalo kamnanzi njengomongameli welizwe.
UChamisa uke wazisa ukuthi uzagcotshwa ukuba ngomongameli ngabe bandla lakhe. Unobhala wenhlanganiso yeZCC, uMnu. Kenneth Mtata utshele iStudio Seven ukuthi ngempela imizamo yokuletha ababili etafuleni ikhona kodwa wala ukuveza okunengi ngaloludaba.
UChris Gande we Studio Seven uxoxe loMfundisi Useni Sibanda oseke waphatheka kumizamo yokukhumisana umlotha kukaChamisa loNkosazana Thokozani Khuphe.
“Mina ngibona lokhu kuqakathekile ukuthi kube lendlela yokuletha abantu laba ukuthi bahlale phansi bakhulumisane njengama Zimbabweans. Bakhulume bebeka eceleni ukuthi bavela ngaphi kodwa bakhangele ingqubela phambili yelizwe,” kutsho uSibanda.
Uthi kumele ababili laba bakhulumisane ngokuthi inotho yelizwe ingalungisiswa njani.
Uthi akula enye indlela engalungisisa umnotho welizwe ngaphandle kokukhulumisana.
USibanda uthi ulethemba lokuthi indlela yokusebenzelana izatholakala.
