Umqeqetshi weqembu leDynamos uLloyd Chigove uthi akusoze kubelula ukuxotshanisa impala ezimbili njengoba leliqembu lidlulele kusigaba esilandelayo senkezo yeChibuku ikanti lilwisa ukungagunyulwa kusigaba sePremier Soccer League.
IDynamos ngelinye lamaqembu amane afinyelele kumasemi-final eChibuku Super Cup ngemva kwemidlalo yangempelaviki.
IDembare itshaye iHerentals nge4 ka3 ngemva kokutshaywa kwembekwa. Umdlalo ubuphele zingutshiki lobhanqa 1 ka 1.
“Udubo esibhekane lalo yikuba sesisilwa kunxa ezimbili; yikho ke yonke imidlalo esesizayidlala iyabe ifana nje le-final,” kutsho uChigove.
“Kodwa sizazama ngamandla wonke ukuqeda i-season yalonyaka siphethe okuthile; okusemqoka yikuba iqembu lingagunyulwa kusigaba saphezulu.”
Iqembu leDynamos lihlezi endaweni yesine nxa usuka ngaphansi kwengalane yemiklomelo okutsho ukuba lingazithola selidlala ku-Division One ngomnyaka ozayo nxa iseason ingafika emaphethelweni lingazange likhuphuke lisuke kuleyondawo kumbe nxa lingayala lilokhu litshelela lisiya phansi.
Amanye amaqembu aphumelele kumidlalo yeChibuku ngabalisa eliphethe linkezo eleHarare City lona elinqobe eleHighlanders nge 2 ka nya, eleCAPS United elinqobe eleChapungu nge 4 ka 3 leleTriangle lona elinqobe eleNichrut nge 5 ka 1.
