amalinks wokungena

Breaking News

Umqeqetshi Weqembu lamaWarriors Utshayela Abafana Bakhe Ihlombe


Umqeqetshi weqembu labesilisa elimela ilizwe emdlalweni wenguqu uSunday Chidzambwa usetshayele ihlombe abafana bakhe ngokwenelisa ukuthatha imiklomelo emine kumidlalo yomkhankaso weAfcon eliyidlale leqembu leDRC.

Iqembu lamaWarriors liphume lilemiklomelo emine ngemva kokudibana leDRC kumidlalo emibili njengoba linqobe nge2 ka 1 emdlalweni oqhutshelwe khonale kweleDRC ngoMgqibelo kwathi ngoLwesibili lawa maqembu aba ngutshiki lobhanqa 1 ka 1 emdlalweni oqhutshelwe eHarare.

UChidzambwa uthe abafana bakhe benze umsebenzi omuhle kakhulu njalo bebengathatha yonke imiklomelo eyisithupha alubana abadlali bebekhona bonke.

“Udubo esihlangane lalo yikuba besilabadlali abalimeleyo kanye labanye abamiswe ukudlala kuyisijeziso sokwephula imithetho yenguqu,” kutsho uChidzambwa.

“Ukungatholi yonke imiklomelo kube ngumnyama nje kuphela kodwa ngiyathokoza ngendlela esidlale ngayo njalo sesikhangelele ukuba sidlale kuhle emdlalweni wethu olandelayo esizawudlala leqembu laseLiberia.”

Iqembu leZimbabwe lihlezi phezu kwengalane yesibaya sikaGroup G ngemva kwemidlalo emine lilemiklomelo eyithoba minwembili kuthi eleDRC lisendaweni yesibili lilemiklomelo emihlanu.

Endaweni yesithathu kuleqembu leCongo Brazzaville lona elilemiklomelo emine njalo lilingene ngemiklomelo leqembu elijeke amanye engalaneni eleLiberia kodwa ehlukaniswa yikuba eleLiberia selahlohlwa kanengi.

Kulamaqembu amane asephumelele ukuyadlala kumncintiswano wokudinga intshantshu zezwekazi leAfrica ozaqhutshelwa elizweni laseCameroon ngomnyaka ozayo njalo lawa ngabalisa eleMadagascar lona okuzakuba kungokwakuqala ukuba liphatheke kumncintiswano weAfcon.

Amanye amaqembu asephumelele ngabalisa eleEgypt, Senegal kanye leleTunisia.

Iqembu leZimbabwe lizavakatshela eleLiberia emdlalweni walo olandelayo ozadlalwa ngenyanga ezayo kuthi emdlalweni walo wokucina lizemukela eleCongo Brazzaville emdlalweni ozadlalelwa ekhaya.

please wait

No media source currently available

0:00 0:01:59 0:00

Facebook Forum

XS
SM
MD
LG