Uzulu uthi iziphathamandla zikahulumende ezilamankampani kazimelanga ziphiwe amakontilaha kuhulumende ngoba lokho kukhuthaza umkhuba wenkohlakalo.
Imbono le ilandela imbiko ethi umphathintambo obona ngezamandla kagetsi uMnu Joram Gumbo ulenkampani eyaphiwa umsebenzi kugatsha olwaluphansi kwakhe esangumphathintambo obona ngokuhamba kwezimota.
Iphephandaba likahulumende eleHerald lithi inkampani kaGumbo eyeJMCD yaphiwa umsebenzi wokuthungela ugatsha lweZINARA impahla esangumphathintambo obona ngokuhamba kwezimota.
Ngamanye amazwi, inkampani kaGumbo le yayisidla kugatsha lukahulumende aluholayo.
Abanye bathi ikomishini ekhangelane lokulwisana lenkohlakalo iZimbabwe Anti-Corruption Commission kumele ilucubungule loludaba.
Umkhokheli walikomishini uMnu Goodson Nguni utshele iStudio 7 ukuthi uzalukhangelisisa udaba lolu andubana akhulume lentathelizindaba.
Yena uMnu Gumbo ukuvumile konke lokhu kuphephandaba leHerald kodwa wathi akulamthetho awephulayo.
Kodwa uzulu uthi akwenzayo akumelanga kuvunyelwe ngoba kukhuthaze ukungethembeki. Sixoxe lesiphathamandla seMDC-T uMnu Abednico Bhebhe.
"Kungayenzakala ukuthi itender le yayenzwa kungela ukuziphatha kuhle, ikakhulu kunguye umlamlankunzi. Lalabo abaphansi kwakhe baba lokwesaba ngoba bekwazi ukuthi icomapany ngeka mlamlankunzi," kutsho uBhebhe.
