Umkhokheli webandla leMDC, uMnu. Nelson Chamisa uthi usomabhizimusi owaziwa ngelokuthi Queen Bee usebenzelana lomongameli Emmerson Mnangagwa.
Umuntu lo, kutsho uChamisa, nguye ohuquluza inotho yelizwe ngoba ephiwa imali yeMelika kulabanye osamabhizimusi osekumenza enelise ukukhokhela iziphathamandla zikahulumende.
UChamisa ubekhuluma lokhu embuthanweni wokuthakazelela ukufikisa iminyaka elitshumi lasithoba munwe munye lokhu lelibandla labunjwa.
UChamisa ubuze abasekeli bebandla ukuthi kungenwe na emgwaqweni abantu beyosusa uMnangagwa esigodlweni se State House inkundla yavungama isithi akungenwe emgwaqweni khonapho khonapho.
Kodwa umgcinisihlalo webandla leli, uNkosazana Thabitha Khumalo utshele iStudio Seven ukuthi basangena ezigabeni besizwa imbono kazulu ngaloludaba.
“Esikuthetheyo yikuthi njengebandla lani liyakwazi ukuthi akulalutho esilwenzayo singayanga kuzulu, ukuthi siyemuzwa uzulu iZimbabwe yonke,” kutsho uKhumalo.
Lokhu sikudaba lunye, umkhokheli webandla leMDC, uMnu. Nelson Chamisa uthi usefuna ukukhulumisana loMongameli Emmerson Mnangagwa.
UChamisa ukhulume lokhu embuthanweni wokuthakazelela ukufikisa iminyaka elitshumi lasithoba munwe munye lokhu lelibandla labunjwa.
Kodwa lokhu kwenziwa ukhetho ubesithi kafuni ukukhulumisana loMnangagwa ngoba waqilibezela kukhetho.
Ukuhlaziya loludaba sixoxe lengcwethi ecubungula ezombusazwe, uMnu. Ngqabutho Nicholas Mabhena.
“Ngoba ukhetho solwadlula siyazi ukuthi ibandla elibusayo alingeke lavuma ukuthi ukhetho lwenziwe kakutsha,” kutsho uMabhena.