Ibandla leMDC lithi impilo yomkhokheli walo uMnu Nelson lemuli yakhe kanye leyenkokheli yalelibandla isengozini enkulu ngoba uhulumende ehlose ukubenza okubi.
Lelibandla lethule amazwi la ngoMvulo ngemva kwesehlakalo sangoMgqibelo lapho elithi kulabacuphi abazame ukuthumba uChamisa eMabvuku evela emhlanganweni wakhe eMarondera.
Kuloyedwa wabantu abavikela uChamisa olimeleyo kusehlakalo lesi. Isiphathamandla seMDC esibona ngezomvikela sithethwe ngamapholisa ngoMvulo esibuzisisa ngalesi sehlakalo.
“Impilo kaMnu Chamisa isisengozini enkulu njalo sesinanzelele ukuthi uhlala ehlaselwe,” kutsho isikhulumeli seMDC uMnu Jacob Mafume ekhuluma lentathelizindaba ngoMvulo.
“Siyakwazi ukuthi uChamisa ngumuntu oyazakalayo kodwa sikhathazeke ngohulumende osemhlasela yonke indawo aya kiyo okufana lokwakusenziwa nguhulumende weApartheid njalo lokhu yikwephula isisekelo sombuso.”
UMnu Mafume uthe lokhu ayisikho okwakuqala ukuthi uMnu Chamisa athunjwe ngabacuphi. Bake bamthumba bamtshaya kakubi enkundleni yendizamtshina eminyakeni edluleyo.
Wengeze wathi inkokheli yeMDC egoqela omunye wabasekeli bakaMnu Chamisa, uMnu Morgan Komichi, layo ihlezi ihlaselwa ngabacuphi.
Umphathintambo kahulumende obona ngokwethulwa kwemibiko uNkosikazi Monica Mutsvangwa uyilandule imbiko yeMDC esithi abantu uChamisa athi bazame ukumthumba ngabantu nje ekade bezihambela.
UMutsvangwa uthe abantu laba kayisibo bacuphi njalo kabasebenzeli uhulumende. Wengeze wathi uMnu Chamisa nguye ohlasela abantu laba wabahlukuluza esithi bayamlandela.
