Ampaholisa athi uMongameli Emmerson Mnangagwa nguye owathumela ibutho ukuthi lingene ezitaladeni ngesikhathi abasekeli bebandla le MDC betshengisela qede kwafa abantu abayisikhombisa.
Lokhu kwethulwe ngumkhokheli wamapholisa, uMnu. Gideon Matanga kukhomisheni ecubungula imbangela yokubulawa kwabantu laba.
UMatanga wengezelele esithi balobufakazi bokuthi umkhokheli webandla le MDC, uMnu. Nelson Chamisa engaba elesandla ekutshotshozeleni abantu laba okuzabangela ukuthi bambomphe.
Esipha ubufakazi bakhe uMatanga uthe amasotsha asebenzisa izikhali zabo zohlobo lwe AK 47 ngonanzelelo ngoba bengakwenzanga lokho kwakuzakufaba abantu abanengi kakhulu ngenxa yokuthi abasekeli beMDC laba babelobudlwangudlwangu obesabekayo.
Owayekhokhela amasotsha lamapholisa awogatsha lwe National Reactionary Force, uBrigadier General Ancelom Nhamo Sanyatwe utshele ikhomisheni le ukuthi akulamuntu ngitsho loyedwa owabulawa ngamasotsha.
Uthi abafayo kumbe ukulimala badutshulwa ngabosomabhizimusi ababevikela izitolo zabo.
Uthi amasotsha akumfanekiso eyethathwa kusenzakala ayedubula emoyeni ukwethusela nje ababegqekeza izitolo betshisa impahla edolobheni le Harare.
Umkhokheli webutho, uMnu. Phillip Valerio Sibanda utshele ikhomisheni le ukuthi akulasotsha eladubula umuntu esithi nxa kulabalobufakazi bokuthi amasotsha adubula abantu abaze phambili lalobu bufakazi.
Ikhomisheni le izaqhiubeka kusasa isizwa ubufakazi.
Akwaziwa ukuthi uMnangagwa lo Chamisa bazamiswa na phambili kwedale leli.
Ukuhlaziya loludaba uChris Gande weStudio Seven uxoxe lowalwa impi yenkululeko, uMnu. Max Mkandla othi ikhomisheni le yenza isizengelezane kulokuthi ikhangele ukuthi owapha imvumo amasotsha ukuthi adubule abantu ngubani.
