Inhlanganiso yabodokotela abalwela amalungelo oluntu eyeZimbabwe Association of Doctors for Human Rights (ZADHR) ikhuthaze uhulumende ngoLwesine ukuthi abophe amasotsha aphatheka ekubulaweni kwabantu ngemva kokhetho labasekeli beZanu PF ababehlukuluza uzulu.
Inhlanganiso le ithi ngaphandle kokudutshulwa lokuhlukuluzwa libutho, abantu abanengi bahlukuluzwa ngabasekli beZanu PF ngendlela ezitshiyeneyo ezigoqela ukubanjwa iganyavu kanye lokutshaywa ngezikhali ezehlukeneyo.
I-ZADHR ithi njalo odokotela bayo benelisa ukwelapha abantu abalikhulu lambili ababelinyazwe ngendlela ezitshiyeneyo.
Inhlanganiso le iveze lokhu kugwalo lwayo oluphathelane lokuhlukuluzwa kwabantu ngemva kokhetho olulesihloko esithi, “Medical Evidence of Post-Election Violence in Zimbabwe.”
Lanxa omunye wabaphatheke ekulotshweni kogwalo lolu, uDr. Norman Matara, eveze inani labantu abathola usizo kunhlanganiso yakhe, uthe inani labantu abalimalayo jikelele kalaziwa ngoba odokotela, ikakhulu abasebenza ezibhedlela zikahulumende, babesethuselwa.
I-ZADHR ixwayise njalo uhulumende ukuthi aqinise ingatsha zakhe ezibona ngezamalungelo ezigoqela olweNational Peace and Reconciliation kanye leZimbabwe Human Rights Commission ukuze zilondoloze amaungelo oluntu ngokugcweleyo.
Asenelisanga ukukhulumisana lohulumende kumbe iziphathamandla zeZanu PF ngaloludaba.
