Namhla kuhlelo lwethu Liphuma Lendaba Litshona Lendaba sixoxa loMnu. Diliza Mangoye owake wabalipholisa osekubandla le ANSA sihlaziya ukudutshulwa kwabantu eHarare okwenzakala mhlaka 1 Ncwabakazi sisebenzisa ulwazi lwakhe lwesipholisa.
UMangoye uthi ngokubona kwakhe abantu abatshengiselayo babengamelanga bangene ezitaladeni ngoba ugatsha lwezokhetho lwalungakaphelelwa yisikhathi esifakwe ngumthetho ukuthi kwethulwe impumela yokhetho.
Umkhokheli webandla leMDC, uMnu. Nelson Chamisal aye wasola abatshengiselayo esithi kwakumele baqale bamelele ukwethulwa kwempumela.
UMangoye uthi bakhona abathi ngabe kwethulwa impumela kaMongameli kuqala ngoba amavoti kahulumende yiwo aqala ukubalwa.
“Amasotsha ngendlela angena ngayo angiboni ukuthi amasotsha ayesebenzise amandla awo wonke ehluleka. Kumele amapholisa asebenzise okuthiwa yi button and shield, izinduku leziyana, nxa kungehlula bayafaka lokwana okuthiwa yi teargas, kungehlula kuyabuya imota leyana elamanzi ibaphushe. Kungehlula kuyabuya izinja kumbe kuze kubuye okuthiwa yimounted section eyamabhiza,” kutsho uMangoye.
Uthi konke lokhu kwakumele kusetshenziswe andubana amapholisa athi kwehlule.
Uthi ngomthetho kumele ukuthi nxa amasotsha engena ezitaladeni angene ephansi kokuqondiswa ngamapholisa kodwa lawo abonakala emangele.
Uthi lokhu kungangokuthi bamele baqale behle ezimoteni zabo babikelwe ngamapholisa ukuthi udubo lumi njani.
“So okwenzakalyo yikuthi amasotsha athi engena ahle aba ku action okutshengisela ukuthi kwakungela coordination. And ku TV kwakukhanya ukuthi kwamanye amakhona ayethukile esibona amasotsha esefikile okutshegnisa ukuthi lawo ayengatshelwanga ukuthi amasotsha ayeza,” kutsho uMangoye.
