Sekuqhamuke ukufuthelana phakathi kwenhlanganiso ezilwela amalungelo kazulu logatsha lwendaba zasekhaya kweleSouth Africa ngemva kokuba lolugatsha luveze amacebo alo okwethula umthetho ozakwenqabela ukuthi abantwana abazalwa ngabazali bakwamanye amazwe abahlala kweleSouth Africa bengaphiwa incwadi zokuzalwa.
Lumthetho ofuna ukwethulwa lugatsha lwendaba zasekhaya ubhalwe ku National Gazette No. 41970, 12 October 2018, Vol 640, Page 78 Notice No. 1085, ukuze abantu betsho abakucabangayo ngawo (http://pmg-assets.s3-website-eu-west-1.amazonaws.com/181012draftreg-registrationofbirthsdeaths.pdf).
Ngokutsho kwesiphakamiso salo umthetho abantwana abazalwa ngabazali bakwamanye amazwe bazaphiwa amakhadi okuzalwa kuphela besebethunyelwa kuzigodlo zamazwe abo ukuthi zibasize ukuyathola incwadi zokuzalwa emazweni abo.
Inhlanganiso ezibalisa iCentre for Child Law, Lawyers for Human Rights, Scalabrini Centre of Cape Town, UCT Refugee Law Clinic le African Diaspora Forum zithi zizaphikisana lokuphasiswa kwalo umthetho ngoba wephula ilungelo labantwana.
Zithi uzakwenza ukuthi abantwana beziphepheli ezingenelisi ukuya ezigodlweni zamazwe azo, bekhule bengalalizwe, besekusithi abantwana abazintandane labo kube njalo.
Umgcinisihlalo wenhlanganiso yeAfrican Diaspora Forum osanda kukhethwa umnumnzana Vusa Sibanda, uthi abavumelana lokuthi isiphakamiso lesi semukelwe njengomthetho ngoba zizathwalisa abantwana laba amagabha avuzayo.
“Sikubona kuyinkinga enkulu kakhulu lokho njalo kuzohlukumeza ingane ezingakwazi ukuzikhethela ukuthi zizalwa kuphi kumbe abazali bazo bayaphi nazo. Sibona ukuthi nxa ingane lezi zinganikezwanga incwadi zokuzalwa lapha eSouth Africa, lokhu kuzonikeza abantwana laba inkinga enkulu kakhulu ukuthi banelise ukuya ezikolweni, bafunde bathole losizo ezibhedlela ngoba bazobe bengenazo incwadi zokutsho ukuthi bangobani,” kutsho uSibanda.
Leyinto egcizelelwa ngumgcinisihlalo weZimbabwe Community in South Africa umnumnzana Ngqabutho Mabhena yena othi abantwana bakwamanye amazwe bazathwala nzima ngaphandle kwabeZimbabwe njengoba bevele bengazitholi incwadi zokuzalwa kuleli.
“Thinake abeZimbabwe umuntu nxa engathola umtwana esibhedlela eseSouth Africa, uyahamba eZimbabwe Consulate ayethatha ibirthcertificate eyeZimbabwe. Nxa esefike iminyaka engu 16, ulalo ithuba lokuthi a aplayele icitizenship ye South Africa kumbe eyabazali bakhe,” kutsho uMabhena.
Kodwake isizalwane seZimbabwe umnumnzana Greatman Mkhwebu, uthi ungaba ngumthetho omuhle ongafundisa izizalwane zezwekazi leAfrica ukuthi zihlale emazweni azo zixazulule inkinga zazo hatshi ukubalekela kwamanye amazwe.
“Ingani zakithi sezikhulela lapha zifunda yonke into yobugebenga ukuthi umntwana wazi ukuphatha isibhamu eyingane. So umntwana ma engabuyela eyekondliwa akhulele kibo athathe ubuzwe bakibo, kuzosiza kakhulu ukuthi basebenzele ilizwe lakibo, labadala bakhumbule ukuthi ekhaya kuyakhiwa hayi ukuthi umuntu eququmise abantwana ebangcwalisa lapha eSouth Africa, yet ngale imizi isala ingamanxuwa,” kutsho uMkhwebu.
Ngokutsho komthetho womhlaba, ilizwe lapha umntwana azalelwa khona yilo elilomthwalo wokumupha incwadi yokuzalwa kungakhathalekile ukuthi ilungelo lokuba yisizalwane sakulelo lizwe useliphiwe kumbe hatshi.