Iqembu leHighlanders libe ngutshiki lobhanqa leleFC Platinum emdlalweni walo wokucina owomncintiswano weCastle Lager Premier Soccer League (PSL) odlalelwe enkundleni yeBarbourfields koBulawayo ngoLwesithathu.
Lumdlalo udlalwe phakathi kweviki ngoba iqembu leFC Platinum, okuyilo intshantshu zePSL, kumele liyedlala leqembu leCNaPS elakwele Madagascar ngeviki ezayo khonale kweleMadagascar.
Loba kunjalo, iFC Platinum kayizange iphumuze abadlali bayo abavele bejwayele ukudlala.
Ekhuluma lentathelizindaba ekupheleni komdlalo, umqeqetshi waleliqembu uNorman Mapeza uthe lokhu ukwenze ngoba iqembu laseMadagascar lidlala ngendlela engafani ngitsho leye Highlanders.
Imidlalo yokucina yePSL iyaqhubeka ngoMgqibelo lapho iqembu leYadah elizadlala khona leleHarare City ngaseRufaro, iqembu leZPC Kariba lizakwemukela eleBulawayo Chiefs eNyamhunga kuthi iqembu leNgezi Platinum Stars lidibane leleBlack Rhinos eBaobab.
Iqembu leChicken Inn lizadibana leleTriangle enkundleni yeLuveve, iNichrut izadlala leDynamos eAscot kuthi iCAPS United yona izangqikilana leChapungu eAscot Stadium.