Intengo yempahla ezitolo ibiphezulu ko Bulawayo lanxa umhlaba phose wonke jikelele intengo ibehlisiwe ngalelilanga kuthakazelelwa ilanga elithiwa ngoLwesihlanu Omnyama, kumbe Black Friday ngesingisi.
Ezinye zezitolo ezitholakala ilizwe lonke jikelele, ikakhulu eHarare, zehlise intengo kakhulu okuvumele uzulu ukuthi athole ithuba lokuthenga ngentengo ephansi.
UMnumzana Dumisani Mpofu ohlala koBulawayo uthi bekugcwele abantu abanengi ezitolo ikakhulu kwezezigqoko ngenxa ye Black Friday. Uthi isimanga yikuthi abantu balemali enengi kakhulu loba nje izinto zinzima elizweni.
"Abantu bebegcwele lamhlanje ngaleyiBlack Friday ikakhulu kwawezigqoko. Angizange ngithole ithuba ukuthi ngingene kodwa abantu bebebanengi. Kodwa ke kwezinye indawo ezingasizo zezitolo angiboni ukuthi bake bazama ukwehlisa intengo. Uyamangala ukuthi imali abantu bayithatha ngaphi ngoba izinto zinzima so,” kutsho uMpofu.
uNkosazana Immaculate Nyoni uthi ezitolo ezinengi bayakhweza Intengo banganaki ukuthi imali yakwelemelika iyalingana leyalapha.
Kutsho uNyoni: “AmaPrices esikubonayo yikuthi uMinister wathi one is to one kodwa esesikubona yikuthi ezitolo ezinengi bayakhweza bathi one is to three. Esikubonayo yikuthi iBond leYusa akulingani. Njapo esesikubona yikuthi izinto ziqhubeka zikhwela. Konke lokhu okwakuleFree Duty kizabhadala okokuthi izinto ziyakuwela.”
Esinye njalo isakhamuzi sako Bulawayo uMnu. Mkhokheli Mahlangu uthi isimo asimanga kuhle njalo izinto azisatholakali.
“okwenzakalayo yikuthi isimo asisamanga kuhle kwelakithi. Besicabanga ukuthi maybe izinto ziyabangcono kodwa lokhe zisiba worse. To get iFive litres cooking oil kuthiwa uthenge okunye ungakaze wayithenga laying,” kutsho uMahlangu.
UMnu. EJ Sabwe ukhulume kakhulu ngesimo samafutha ezimota elizweni esesiqala njalo ukuba sibi laloba uhulumende wayethe uthole amafutha azaqhuba ilizwe okwesikhatshana.
“Indaba yeFuel bakithi isithwalise nzima bengakakhwezi iFuel. Bebevele besethusela ngokukhweza kungakaze kufike lapha. Imota zePetrol bezivele zingekho emgwaqweni,” kutsho uSabwe.
Intengo yempahla ehlukeneyo elizweni jikelele lokhe ikhuphuka lanxa uhulumende esithi imali yohlobo lwe bond ilingana leyeMelika.
