Umqeqetshi weqembu lomdlalo wenguqu eliphakamise isicoco kusigaba se Southern Region Division One Soccer League ele Hwange uNation Dube uthi usebenzise umncintiswano we John Landa Nkomo Memorial Cup ukuba akhethe abadlali azahamba labo kusigaba se Premier Soccer League ngomnyaka ozayo.
Iqembu le Hwange linqotshwe nge 1 ka 0 liqembu le Talen Vision okuyimpumela etsho ukuba ele Talen Vision yilo eliphakamise inkezo ye John Landa Nkomo Memorial Cup.
Iqembu le Hwange ligunyulwe kusigaba se Premier Soccer League ekupheleni kwesizini yanyakenye kodwa lihle laphanga laphindela kusigaba saphezulu ngemva kokuqeda imidlalo yalo kusigaba se Southern Region Division One Soccer League lihlezi phezu kwengalane.
Ekhuluma lentatheli zemidlalo ekupheleni komdlalo we final eyenkezo ye John Landa Nkomo Memorial umqeqetshi weqembu le Hwange uNation Dube uthe ukudonsa kanye kanye kuliphathisile iqembu le Hwange ukuze liphakamise isicoco seligi.
“Isizini yalonyaka yona ibinzima kodwa ngithanda ukubonga imuli yonke ye Hwange ngokusebenzelana ndawonye.
Umdlalo wanamhla siwusebenzise ukuze sibone ukuba yibaphi abadlali esizahamba labo ku PSL ngomnyaka ozayo,” kutsho uDube.
Ngakwelinye icele umqeqetshi weqembu le Talen Vision uMkhuphali Masuku yena utshayele ihlombe abafana bakhe ngokuphakamisa abakwenze inkezo ye John Landa esithi kwezemidlalo kuvele kumele kujatshulwe kuntshintshwana.
“Ngijabule kakhulu ngijabulela imuli yonke ye Talen Vision ngomsebenzi lo omkhulu kangaka. Umnyaka lo ubumude njalo bekungekho lula kodwa okungijabulisayo yikuthi loba iqembu le Hwange lithole isicoco seligi lathi sesenelise ukuthola lokhu esesikutholile,” kutsho uMasuku.
Iqembu le Hwange lithole ilungelo elokuyadlala kusigaba se PSL ngomnyaka ozayo ngemva kokuphutsha imidlalo yalo liphezu kwengalane njalo lilemiklomelo engamatshumi ayisikhombisa lambili kuthi ele Talen Vision lona liphutshe umncintiswano weligi lisendaweni yesithathu njalo lilemiklomelo engamatshumi amahlanu lanhlanu.
