Inkulungwane lenkulungwane zabasekeli bebandla leMDC zitshengisele eHarare ngoLwesine zisola umbuso kaMongameli Emmerson Mnangagwa zisithi waqilibezela kukhetho olusanda kwedlula njalo uyehluleka ukulungisisa umnotho welizwe, wona oqhubeka ubhidlika.
Ekhuluma kumbuthano wokutshengisela lokhu, umkhokheli walelibandla uMnu Nelson Chamisa uchothoze uMnangagwa esithi abantu beZimbabwe bebephila ngcono kakhulu phansi kombuso kaMugabe kulakhathesi.
Ngalokho, uChamisa uthe kumele kubunjwe uhulumende ozabamba intambo zombuso okwesikhatshana kulungisiswe umnotho welizwe kanye lezombusazwe ezingamanga kuhle.
UMnu Chamisa ukhuthaze uMnangagwa ukuthi ahlabe phansi laye babonisane ukuthi udaba lweZimbabwe lungalungisiswa njani.
Uveze njalo ukuthi ulobele uMnangagwa, umanyano weSadc loweAfrican Union incwadi yezikhalazi afuna zilungisiswe, ezigoqela ukulondolozwa lokuhlonitshwa kwamalungelo oluntu.
Ukuze kube lobubelo kwezenotho, uMnu Chamisa ukhuthaze uhulumende ukuthi esule ukusetshenziswa kwama-bond notes njalo angene kumanyano wamazwe asebenzisa iRand laseSouth Africa.
Ududuze uzulu weZimbabwe obhekane lobunzima kwezenotho esithi iZimbabwe entsha elenhlalakahle iyeza maduze.
Uthe njalo umgcinisihlalo wekhomishini yezokhetho uNkosikazi Priscilla Chigumba kumele axotshwe umsebenzi ukhetho luka2023 lungakafiki.
Kusenjalo ibandla leMDC lithi amalunga alo ephalamende athunyelwe incwadi yiziphathamandla zalelidale ziwethusela ngokutshengisela lokhu.
Umbiko lo ubulotshwe ngolimi lwesiShona kanje: “Zita rangu ndonzi "Death" Mafreedoms nemarights amunoda kukoshesa aya be careful kuti security in numbers haiwanzobatsiri kana wawega. We are gunning for you.”
NgesiNdebele umbiko lo uthi, “Igama lami nguKufa. Inkululeko lamalungelo eliwaqakathekisayo lawa; qaphelani. Lingacabanga ukuthi livikelekile nxa libanengi kodwa nxa usuwedwa. Sizalilungisa.”
Omunye wamalunga eMDC athunyelwe lumbiko njalo ongumgcinisihlalo walelibandla uNkosazana Thabitha Khumalo usole kakhulu uhulumende esithi lanxa engaze ebethusele njani kabasoze besabe.
Ukuhlaziya ukutshengisela kweMDC sixoxe loMnu. Edwin Ndlovu, umsekeli wesikhulumeli salelibandla koBulawayo, endawonye loMnu. Walter Nsununguli Mbongolwane, ingcwethi ecubungula ezombusazwe, onguye osungula lingxoxo.