Iqembu lamajaha aleminyaka engaphansi kwamatshumi amabili elimela eleZimbabwe emdlalweni wenguqu linqobe eleBotswana nge2 ka1 emdlalweni walo wakuqala womncintiswano weCosafa Under 20 Youth Championships oqale ngeSonto kweleZambia.
Iqembu leZimbabwe, lona elaziwa ngegama lokuthi Young Warriors, lihle landiza layahlala phezu kwengalane yesibaya sikaGroup C lilemiklomelo emithathu ngemva kwalumdlalo.
Amanye amaqembu akusibaya sinye athi eleLesotho kanye leleAngola abe ngutshiki lobhanqa 1 ka 1.
Limpumela itsho ukuba amaqembu womabili alomklomelo owodwa iqembu ngalinye kuthi eleBotswana yilo elisemsileni wengalane lingela ngitsho lowodwa umklomelo.
Umqeqetshi osebenza labasakhulayo uAnele Nyathi uthi abafana beZimbabwe badlale kuhle yebo kodwa kukhona okusilelayo.
“Singathi bona badlale kuhle njalo sibonile ukuthi bayazama ukulifaka phansi ibhola. Into nje esolisayo yikuqina kwabadlali ngoba bekuzikhanyela nje ukuba inengi labo bathwale nzima ukuba bephutshe umdlalo,” kutsho uNyathi.
Inengi labadlali bamaYoung Warriors ngabadlali abangakenelisi ukudlala kusigaba sePremier Soccer League okungaba mhlawumbe yiso isizatho esokuba imizimba yabo ibe ingalungelanga ukudlala imizuzu efika amatshumi ayithobamunwemunye.
Umncintiswano walonyaka ulamaqembu alitshumi lanye ngemva kokuba iqembu leNamibia lithe kalisenelisi ukuphatheka kuwo ngenxa yokuswelakala kwemali.
Lokhu kutsho ukuba isibaya sika Group B sesisele silamaqembu amathathu abalisa eleSouth Africa, eleSwaziland kanye leleMauritius.
Kusibaya sikaGroup A kulamaqembu abalisa eleZambia, okuyilo eliqoqe imidlalo yalonyaka, eleMalawi, eleDRC kanye leleMozambique.
Amaqembu azaphutsha imidlalo yezibaya ehlezi phezu kwengalane kanye lalelo elizaphutsha lilemiklomelo eminengi okwedlula amanye kulawo azaqeda imidlalo yezibaya esendaweni yesibili engalaneni yiwo azadlulalela kuma semi-final.
