Izizalwane zeZimbabwe ezihlala kweleBhilithani zithi ukuphuma kwelizwe leli kumanyano weEuropean Union, okwaziwa ngokuthi yiBrexit akusoze kuziphazamise.
Inengi belingahlalisekanga ngodaba lolu zingazi ukuthi zizasala zikusimo bani. Kodwa esinye isizalwane seZimbabwe uNkosazana Nompilo Ncube uthi akulalutho lokwesaba.
“Amaphepha ethu sawathola kudala sazihlalela thina. Abantu beZimbabwe bazaqhubeka besenelisa ukudinga amaVisa okuza kuleli kungelani eBrexit,” kutsho uMaNcube.
Lanxa abanye besithi ukuphuma kweBhilithani kuEU kuzalethela izizalwane zalelolizwe udubo, uMnu Domingo Sibanda uthi iBrexit ingavula amathuba emisebenzi.
“Sizosizakala thina abaseAfrika ngoba izisebenzi zizodingakala, Bazadinga izisebenzi ezisuka eAfrika mhlawumbe ziphiwe wona lawa amaVisa awabo2years kusiya ku5years,” kutsho uSibanda.
Amalunga edale lephalamende laseBhilithani azavota ngeviki ezayo phezu kokuthi amukele kumbe alahle isivumelwano esenziwe nguhulumende kaNkosikazi Theresa May lomanyano weEuropean Union esokuthi iBhilithane izimele yodwa.
