Isikhulumeli samapholisa koBulawayo uInspector Obediah Ncube ubikwa esithi ukusetshenziswa kwezidakamizwa kuyanda kulelidolobho njalo usexwayise abazali ukuthi benanzelele abantwana babo bengazithengi njengoba sekubotshwe abantu abambalwa abazithengisela abasakhulayo.
Abahlali beEntumbane basanda ukutshengisela bekhatshwe zinhlanganiso ezilwela ilungelo loluntu besola esinye isakhamuzi kulindawo esaziwa ngokuthi nguMaHadebe esibikwa sithengisela abantwana izidakamizwa.
Omunye umzali owayephakathi kwalokhu ukutshengisela, uNkosazana Natasha Muponde uthi ngempela uhlupho lokusetshenziswa kwezidakamizwa lubhahile.
Silokhu sikudaba lunye, asizweni omunye osakhulayo esingasoze simbethe ngegama, othi usebenzisa izidakamizwa, njalo uzama ukwekela lo umkhuba, exoxa kuhlelo lwethu lwe Livetalk loNtungamili Nkomo weStudio 7.