Ababalisi Abangamalunga enhlanganiso elwela amalungelo amatitshala eyeAmalgamated Rural Teachers Union of Zimbabwe (ARTUZ) abaphakathi kokufola besuka eMutare besiya eHarare, babotshiwe njalo ngamapholisa izolo ntambama beseRuwa, besetheswa icala lokutshengisela bengelamvumo evela emapholiseni.
Bavalelwe enkambeni yeHarare Central Police Station ngemva kokuthwalwa ngemota yamapholisa ibasusa eRuwa.
Batshele iStudio 7 ukuthi bahlukuluziwe lapho bengeniswa enkambeni le, njalo bacabangela ukuthi babotshwe ngoba bebekhangelele ukuthi amanye amalunga abo azabaxhasa sebengena edolobheni obekuzabangela ukuthi babe lixuku labantu elikhulu kakhulu.
Ababalisi laba bake babotshwa ngoMgqibelo bese Macheka besetheswa icala elifanayo.
Bakhululwa ngumthethwandaba weMarondera ngoMvulo icala labo lingakathethwa ngoba umtshutshisi esithi kulobufakazi bencwadi evela emapholiseni eMashonaland East, ebanika imvumo yokutshengisela.
Bebemelwe ngamagqwetha enhlanganiso yeZimbabwe Lawyers for Human Rights, njalo amanye amacala abawetheswayo ngawokwephula umthetho wePOSA, kanye lokubangela ukungahlaliseki emphakathini, i criminal nuisance.
Ababalisi bathi esinye sezizatho zokutshengisela ngesokuthi bafuna ukubhadalwa iholo labo ngemali yedola leMelika ngoba amabond notes engaselamandla.
Okunengi ngaloludaba, asikuzweni kungxoxo uSithandekile Mhlanga weStudio 7 ayiqhube loNkosazana Catherine Jubane, umqoqi wenhlelo ze ARTUZ eMatabeleland South, yena obese Harare Central Police Station izolo ebusuku.
