Umqeqetshi weqembu elimele ilizwe kumncintiswano weCAF Champions League eleFC Platinum uNorman Mapeza uthi iqembu lakhe libhekane lomdlalo onzima njalo lidinga usekelo ukuze linqobe iqembu lakweleCongo Brazzaville eleAS Otoho ngoMgqibelo.
UMapeza uthi kabasoze balidelele iqembu leAS Otoho ngoba likhuphe iqembu lePrimeiro de Agosto okuliqembu elakhupha eleFC Platinum kumncintiswano weCAF Champions League odluleyo.
Uthi bayakwazi mhlophe ukuba babhekane lani kumdlalo wakusasa njalo abakudingayo yikuxhaswa yibo bonke abayingxenye yemuli yeFC Platinum.
“Wonke umuntu uyazi ukuba sisalelwe yimizuzu engamatshumi ayithoba munwe munye ukuba sifinyelele kusigaba sezibaya esomncintiswano we CAF Champions League yikho siyakwazi ukuba kuyini esibhekane lakho ngoMgqibelo,” kutsho uMapeza.
“Silethemba njalo ukuba sizathola usekelo esiludingayo kuye wonke umuntu oyingxenye yeqembu le FC Platinum ukuze sidlulele phambili kulumncintiswano.”
Iqembu leFC Platinum leleAS Otoho abe ngutshiki lobhanqa 1 ka 1 ngeSonto njalo limpumela itsho ukuba iqembu leFC Platinum lingadlulela phambili nxa umdlalo ungafika komlindi uyacina zingutshiki lobhanqa kungela qembu elenelise ukuhlohla.
UMapeza yena uthe bazazama ukuba behlohle ngoba nxa bengadlala besithi bafuna umdlalo uphele kungahlohlanwanga bengazisola iqembu lezivakatshi selihlohle isikhathi sesisiya phela.
Iqembu leFC Platinum seliyake limele ilizwe leZimbabwe kumncintiswano eyokudinga intshantshu zezwekazi laseAfrica kodwa kalizake lenelise ukufinyelela kusigaba sezibaya lapho okutholakala khona imali ethe xaxa njalo abanengi bakhangelele ukuba lonyaka lingakwenelisa lokhu njengoba kusasa lizabe lidlala lisekhaya.
Ngakwelinye icele iqembu leAS Otoho ngokwakuqala ukuba liphatheke kumncintiswano we CAF Champions League.
Iqembu leFC Platinum lithole ilungelo elokumela ilizwe leZimbabwe kumncintiswano wokudinga intshantshu zezwekazi lase Africa ngemva kokuphakamisa isicoco seligi lonyaka, njalo ngokwesibili iminyaka ilandelana ukuba liphakamise inkezo yeligi.
Umdlalo wangoMgqibelo lo uzaqhutshelwa enkundleni yeMandava eZvishavane.
